राष्ट्रियसभाया १९ क्वःगु अधिवेशन थनिनिसें न्ह्यायेत्यंगु दु। न्हू बानेश्वरया अन्तरराष्ट्रिय सम्मेलन केन्द्रय् च्वंगु संसद् भवन जेनजी आन्दोलनया झ्वलय् च्यानाः झौ जूगुलिं सङ्घीय संसद् सचिवालय सिंहदरबारय् अधिवेशन सञ्चालन यायेगु तयारी याःगु दु।

अधिवेशनया तयारीया निंतिं अध्यक्ष नारायणप्रसाद दाहालं शुक्रबाः हे कार्यव्यवस्था परामर्श समितिया बैठक आह्वान यानादीधुंकूगु दु। अधिवेशनया न्हापांगु बैठकय् अध्यक्ष दाहालं राष्ट्रपतिपाखें अधिवेशन आह्वानया पौ ब्वनाः न्यंकीगु व छुं दिं न्ह्यः मदुम्ह नेपाली कांग्रेसया सांसद बलदेव बोहराया निंतिं शोक प्रस्ताव न्ह्यब्वइगु ज्याधलः क्वःछिनातःगु दु।

सङ्घीय संसद् सचिवालयया प्रवक्ता एकराम गिरीया कथं अधिवेशनया फुक्क तयारी पूवनेधंकूगु दु। राष्ट्रपति रामचन्द्र पौडेलं नेपाःया संविधानया धारा ९३ या उपधारा (१) कथं नेपाल सरकार, मन्त्रिपरिषदया वंगु २८ गतेया सिफारिसय् थ्वहे माघ ४ गते आइतबाःया दिं सुथसिया ११ः०० ताः इलय् राष्ट्रियसभाया अधिवेशन आह्वान यानादीगु खः। वंगु भदौ ३१ गते राष्ट्रियसभाया १८ क्वःगु अधिवेशन अन्त्य जूगु खः।

थ्वहे दथुइ ,निर्वाचन आयोगं थ्वहे माघ ११ गते राष्ट्रियसभाया १९ म्ह दुजःया निंतिं निर्वाचनया तयारी नापं याःगु दु। राष्ट्रियसभा सदस्यय् छम्ह निर्विरोध निर्वाचित जुयादीधुंकूगु आयोगं धाःगु दु। प्रतिनिधिसभाया निर्वाचनया तयारी न्ह्यानाच्वंगु व राष्ट्रियसभाय् नापं न्हूपिं दुजःपिं निर्वाचित जुयाः वयेत्यंगु अवस्थाय् थ्व अधिवेशनयात महत्व बियाः कयातःगु दु।

Categorized in राष्ट्रिय