संयुक्त राष्ट्रसङ्घया महासचिव एन्टोनियो गुटेर्रेसं संयुक्त राष्ट्रसङ्घया न्हापांगु महासभाया ८० क्वःगु वार्षिकोत्सवया लसताय् शनिबाः लन्डनय् सम्बोधन यानादिसें ‘विश्वव्यापी ग्वाहालियात कमजोर मयायेत झ्वःछुनाच्वंगु शक्तिशाली विश्व समुदायया ध्यानाकर्षण याकादीगु दु।

महासचिव गुटेर्रेसं लन्डनया मेथोडिस्ट सेन्ट्रल हलय् थुजाःगु हाथ्या बियादीगु खः।महासभाया न्हापांगु सत्रया निंतिं सन् १९४६ जनवरी १० य् ५१ देय्या प्रतिनिधिपिं भेला जूगु खः। उगु इलय् न्यूयोर्कय् संयुक्त राष्ट्रसङ्घया मुख्यालय निर्माण मजूनिगुलिं उमिसं लन्डनय् बैठक याःगु खः।

महासचिव गुटेर्रेसं संयुक्त राष्ट्रसङ्घया नीस्वंगु इलय् बेलायतं निर्णायक भूमिका म्हितूगुलिं च्वछानादीगु दु। वय्कलं सन् २०२५ अन्तर्राष्ट्रिय ग्वाहालि व संयुक्त राष्ट्रसङ्घया मूल्यमान्यताया निंतिं तसकं चुनौतीपूर्ण दँ जूगु धयादिल। “झीसं खनाच्ना, शक्तिराष्ट्रपिं विश्वव्यापी ग्वाहालियात कमजोर यायेत झ्वःछुनाच्वंगु दु”, वय्कलं धयादिल, “झी समस्या दयेकं तकं न्ह्याः वनेगु जुइ।”

\गुटेर्रेसं समुद्री जैविक विविधता सम्बन्धी न्हूगु सन्धियात मदिक्कं प्रगतिया दसिया कथं नापं पिब्वयादिल। थ्व सन्धिं राष्ट्रिय सीमासिबें पिने वनाः स्वब्वय् निब्वः महासागरय् समुद्री विविधताया संरक्षण व दिगो छ्यलाबुलाया निंतिं न्हापांगु कानुनी ढाँचा पलिस्था याःगु दु। वय्कलं धयादिल, “युद्ध दिनाच्वंगु, भोकमरी अन्त्य जूगु व महत्वपूर्ण सन्धित अन्तर्राष्ट्रिय ग्वाहालिया उगु शान्त कथं त्याःगु बुखँया प्रमुख विषय जुइमखु, अथे खःसां थ्व वास्तविक खः व महत्वपूर्ण दु ।”

Categorized in अन्तर्राष्ट्रिय