अमेरिकाया राष्ट्रपति डोनाल्ड ट्रम्पं युरोपेली देश दुने घोषणा याःगु भन्सार शुल्क छु ईया निति स्थगित जुगु घोषणा याःगु दु।

थुगु निर्णय नाटोया महासचिव मार्क रुटे नापलाये धुका अथे घोषणा याःगु खः। राष्ट्रपति ट्रम्पं सामाजिक सञ्जाल ट्रुथ सोसय् च्वंगु दु सहमति कार्यान्वयन जुलकि अमेरिकाया निति जक मखु दक्को नाटो सदस्य देय्या निति न लाभदायक जुइ धका धयादीगु खः।

अय्न थुगु विषय नाटो महासचिव रुटेपाखे छु न औपचारिक पुष्टि याःगु मदुनि धका बीबीसीं धाःगु दु। थ्व स्वया न्ह्यः ट्रम्पं स्वीट्जरल्यान्डया डाभोसय् जुगु विश्व आर्थिक मञ्चयात सम्बोधन यायेगु झ्वलय् ग्रिनल्याण्ड अमेरिकाया राष्ट्रिय सुरक्षाया निति तसक महत्त्वपूर्ण जुगु धका दाबी यानादीगु खः।

डेनमार्कया विदेशमन्त्री लार्स लोके रासमुसेनं नाटोनाप जुगु वार्ता तसकं सकारात्मक जुगु धका धयादीसे अमेरिकां सुरक्षा च्यूता तःगुलि डेनमार्कं सम्मान यायेगु व समाधान मालेत तयार दु धका धयादीगु खः।

Categorized in अन्तर्राष्ट्रिय