नेपाल पत्रकार महासङ्घं ‘नेपाल रिपब्लिक मिडिया लिमिटेड’या पिथना नागरिक दैनिक पत्रिकाय् ज्या यानाच्वंपिं श्रमजीवी पत्रकारतय्त सेवा सुविधा मदूगुलिं चिन्ता प्वंकादिसें तलबया सुनिश्चितता जुइमाःगुलिइ बः ब्यूगु दु।

महासङ्घया वरिष्ठ उपाध्यक्ष दीपक आचार्यलिसेंया टोलीं थौं नागरिक दैनिकया प्रबन्ध निर्देशक लिसें प्रमुख कार्यकारीया कार्यकक्षय् तालं ग्वयाः थत्थें पत्रकारतय्त दयेमाःगु सेवासुविधा उपलब्ध याकेगु सुनिश्चितता जुइमाःगुलिइ बः ब्यूगु खः।

तालं ग्वःगु छुं घौलिपा उगु पिथना गृहं नेपाल प्रहरी, स्थानीय तह व सम्बन्धित पक्ष तयाः ताः चायेकूगु खः। श्रमजीवी पत्रकार ऐनं क्वःछिनातःगु न्यूनतम पारिश्रमिक व सेवासुविधापाखें वञ्चित जुइमाःगु गुनासालिसेंया उजुरी वःगुलिं पत्रकारतय्गु पक्षय् दंगु महासङ्घं ध्वाथुइकूगु खः।

नेपाल पत्रकार महासङ्घ, नागरिक प्रतिष्ठान शाखाया नायः रघुनाथ लामिछानेया कथं ताःइलंनिसें क्वःछिनातःगुसेवा सुविधा कायेमखंगुलिं विरोध, धर्ना, प्रदर्शनलिसेंया ज्याझ्वःलिसें व्यवस्थापनया विरुद्धय् दनेमाःगु खः। वय्कलं संस्थां सरकारपाखें क्वःछिनातःगु न्यूनतम पारिश्रमिक मब्यूगु, कोभिड–१९ या बहानाय् थ्यंमथ्यं ४३ महिना तक ५० निसें ७५ प्रतिशत तक तलब पाः याःगु गुनासो यानादिल।रिपब्लिक मिडिया लिमिटेडया नायः शोभा ज्ञवालीं संस्थाय् थ्यंमथ्यं ३०० म्ह पत्रकार लिसें कर्मचारीत ज्या यानाच्वंगु जानकारी बियादिसें क्वःछिनातःगु भाला स्वयां नं विरोधया ज्याझ्वलय् छुं छुं पत्रकार लिसें कर्मचारी दुथ्याःगुलिं दुःख प्वंकुसें सम्बद्ध पक्षलिसे सहलह यानाः समस्या ज्यंकेत व्यवस्थापन तयार दूगु धयादिल।

वय्कलं देय्या मुक्कं अर्थतन्त्रय् खनेदूगु आर्थिक मन्दीया प्रभाव सञ्चार गृहय् नं लाःगु ध्वाथुइकादिसें स्रोत अभावं यानाः पारिश्रमिक बिइत छुं भतिचा लिबाःगु जूसां नं धात्थेंपिं लिसें पीडित श्रमजीवी पत्रकारनापं कर्मचारीतय्त नं न्याय दइ धयादिल।

Categorized in राष्ट्रिय