येँय् वंगु माघय् ९७६ अपराधया मुद्दा दर्ता जूगु दु। उगु मुद्दात मध्येय् १५९ जघन्य लिसें गम्भीर कथंया अपराधया घटना जूगु जिल्ला प्रहरी परिसर येँका प्रवक्ता प्रहरी उपरीक्षक पवनकुमार भट्टराईं धयादिल।

वंगु माघय् मिसा लिसें मस्त व ज्याथःजिथिपिं लिसें सम्बन्धित २२ मुद्दा दर्ता जूगु दु। आर्थिक अपराधया धाःसा ४६६ मुद्दा दर्ता जूगु नापं प्रहरीं सार्वजनिक याःगु विवरणय् न्ह्यथना तःगु दु। मेमेगु थीथी कथंया यानाः ३४० मुद्दा दर्ता जूगु नापं वय्कलं धयादिल। थ्वहे दथुइ ‘विशेष अपरेसन’ न्ह्याकाः येँय् मोटरसाइकलय् वयाः सतकय् जुइपिं लँजुवातय्त लुटपाट याइपिं झिम्हेसित ज्वनाः कानुनी कारबाही यानागु वय्कलं धयादिल।

फैसला कार्यान्वयनपाखे धाःसा ३६० म्हेसित ज्वनाः उपिं पाखें निगू क्वति नीगू लख तका बं  पुइकागु नापं  प्रहरीं धाःगु दु। अथे हे, न्ह्यानाच्वंगु मुद्दात पाखें ७०९ म्हेसित ज्वंगु दु। गुकी ६३७ म्ह मिजंत दु।मिसा व मस्तलिसे सम्बन्धित उजुरी घरेलु हिंसापाखे १४९ व ठाडो निवेदन ४९ दर्ता जूवःगुलिइ घरेलु हिंसाया १३१ व ठाडो निवेदनय् ३६ मिलापत्र जूगु नापं प्रहरीं धाःगु दु।

Categorized in अपराध