नेपाल कम्युनिष्ट पार्टी (एमालें) न्ह्यःने वयाच्वंगु प्रतिनिधिसभा दुजः निर्वाचनया निंतिं थःगु घोषणापत्र पितब्वःगु दु।

एमालेया केन्द्रीय निर्वाचन परिचालन कमिटीं ग्वसाःग्वःगु चुनावी घोषणापत्रय् आधारित बहस ‘देश पहिला’ ज्याझ्वलय् नायः केपी शर्मा ओलीं संबोधन यानाः आज्जु क्वःछीगुलिसें प्रतिबद्धता पितब्वयादिल।एमालें ‘समृद्ध नेपाः, सुखी नेपाःमि : राष्ट्रिय आकाङ्क्षा झीगु गन्तव्य’ या नारा ज्वनाः उकियात पूवंकेत थःगु पार्टीयात त्याकेमाःगुलिइ बः ब्यूगु खः।

न्हापा थःगु पार्टी सरकारय् दुबलय् न्ह्याकूगु व पूवंके मखंगु सुशासन, विकास, रोजगारी व सामाजिक न्यायया ख्यःयात एमालें मुख्य प्राथमिकता ब्यूगु खः।घोषणापत्रय् थत्थें यायेगु ११ गू ज्या, न्यागू आधारभूत ज्या व २५ गू सङ्कल्प पितब्वःगु खः। नायः ओलीं थुनेगु व च्याकेगु मखुसे दयेकेगु सङ्कल्प ज्वनाः एमालें न्हापाया अनुभव व अभ्यासया कारणं देय्या ख्वाः हिलेगु ज्याया नेतृत्व यायेगु दाबी यानादिल।

वय्कलं स्वाधीनता व राष्ट्रियताया पक्षय् एमाले न्ह्याबलें दृढ दूगु ध्वाथुइकाः थःपिं छुं नं लोकप्रितावाद वा स्टन्टय् केन्द्रित मजुइगु धयादिल।

Categorized in राष्ट्रिय