म्येहालामि पुरुषोत्तम श्रेष्ठं हालादीगु म्ये ‘द्यंसा छ दंसा छ’ या अस्ट्रेलिया छायाङ्कन यानातःगु म्यूजिक भिडियो सार्वजनिक जूगु दु ।

म्येहालामि श्रेष्ठं हे च्वयादीगु म्येया म्यूजिक भिडियो थौं (आइतबाः) अडियो नेपाल युट्युब च्यानलय् सार्वजनिक जूगु खः ।

म्येहालामि श्रेष्ठलिसें वयकःया हे जहान रन्जु श्रेष्ठं अभिनय यानादीगु थुगु म्यूजिक भिडियो स्वनिगःया पश्चिम लागा मातातीर्थ व अस्ट्रेलियाया थीथी शहरय् छायाङ्कन यानातःगु दु ।

मातातीर्थय् म्येहालामि श्रेष्ठया लू बुद्ध सायमिं छायाङ्कन यानादीगु दुसा मोडल कलाकार रन्जु श्रेष्ठया अस्ट्रेलियाया लू जिमोस गोपालीं छायाङ्कन यानादीगु खः ।

थुगु म्ये थः जहान रन्जु श्रेष्ठ अस्ट्रेलिया वनाच्वंगु इलय् थम्हं च्वयागु म्येहालामि पुरुं धयादिल ।

‘रन्जु अस्ट्रेलियाय्, थन जि याकःचा । उगु इलय् जिगु नुगलय् दासि वःगु भावना हे शब्दय् प्वंकागु खः । भिडियोलय् नं व हे भावना पिब्वयागु खः’ म्येहालामि श्रेष्ठं धयादिल ।

म्येया दृश्य सम्पादन नं बुद्ध सायमिं हे यानादीगु दु ।

म्येय् संगीतकार शिव शाहीं लय् बियादीगु दु ।

म्येहालामि श्रेष्ठया थ्वयां न्ह्यः पिदंगु म्ये ‘सुथसिया निभाः जुयाः त्वयाब्यु छ’ लोकंह्वाःगु खः ।

Categorized in मनोरन्जन