प्रधानमन्त्री सुशीला कार्कीं भदौ २३ व २४या घटना जाँचबुझ आयोगपाखें वःगु प्रतिवेदन कार्यान्वयनया प्रक्रियाय् यंकेगु धयादीगु दु।

उगु आयोगया प्रतिवेदन लःल्हाना काये धुंकाः वय्कलं उकियात थः व गृहमन्त्रीं अध्ययन यानाः मन्त्रिपरिषदं न्ह्यब्वयेगु धयादिल। प्रधानमन्त्रीं प्रतिवेदन अध्ययन यानाः कार्यान्वयया प्रक्रिया न्ह्याकेगु व उकियात माःगु कथं सार्वजनिक नापं यायेगु धयादीगु दु।

प्रधानमन्त्री कार्कीें धयादिल, “सार्वजनिक यायेगु खँय् नापं जिमिसं सहलह यानाः, थुकिया विवरण स्वयाः पूवंकं दस्तावेज थत्थें सार्वजनिक याये मफुसां लिच्वः जक जूसां सार्वजनिक यायेगु जुइ।” वय्कलं प्रतिवेदनय् यथार्थ वस्तुस्थिति व सत्यतथ्य दुथ्याःगु धइगु विश्वास नापं प्वंकादिल। लिसें प्रधानमन्त्री कार्कीं आयोगया नायः लिसें दुजःपिंसं यानादीगु मेहनतयात नापं च्वछानादीगु दु।

Categorized in राष्ट्रिय