वंगु शनिबाः वीरेन्द्रनगर–४ सहिदपार्क लिक्क च्वंगु जनजागरण सामुदायिक वनय् १६ दँया मचाल्यासे इनिषा विकयात बलात्कारलिपा हत्या यानातःगु घटनाया दोषीयात कारबाहीया माग यानाः दलित युवां थौं माइतीघर मण्डलाय् प्रदर्शन याःगु दु।

प्रदर्शनय् सहभागीतय्सं ‘जस्टिस् फर इनिषा विक’, ‘दलिततय्त बलात्कार व हिंसा बन्द या’, ‘मिसा अधिकार सुनिश्चित या’ ‘वि वान्ट जस्टिस्’ व ‘मिसा शोषणविरुद्ध छधी जुइनु’ च्वयातःगु ‘प्ले कार्ड’ ज्वनाच्वंगु खः।गुर्भाकोट नगरपालिका–६, बडाखोली स्थायी छेँ जुयाः थौंकन्हय् वीरेन्द्रनगर–१ य् च्वनावयाच्वंम्ह १६ दँया इनिषा फागुन २३ गते सुथय् वीरेन्द्रनगर–४, सहिदपार्क लिक्कया जनजागरण सामुदायिक वनय् बेहोस अवस्थाय् लुयावःगु खः ।

वयात प्रहरीं प्रदेश अस्पताल कालागाउँ थ्यंकूगुलिइ चिकित्सकतय्सं मदूगु घोषणा याःगु खः। मदुम्हेसिया थःथितिपिंसं सामूहिक बलात्कार याःगु धासें २५ गते जिल्ला प्रहरी ज्याकुथि सुर्खेतय् उजुरी ब्यूगु खः।प्रहरीतय्गु न्हापांगु अनुसन्धानं इनिषा बलात्कारलिपा मदूगु पुष्टि जूगु धाःगु खः। उगु घटनाय् सुर्खेत प्रहरीं प्यम्हेसित ज्वने नं धुंकूगु धाःगु खः। 

Categorized in राष्ट्रिय