नेपालभाषा साहित्य ख्यःया आधुनिक कवि, बरिष्ठ पत्रकार, भाषासेवी, नेवाः आन्दोलनया अभियन्ता, भाषा आयोगया दुजः नेवाः पत्रकार राष्ट्रिय दबूया केन्द्रिय सल्लाहकार माननीय सुरेश किरण मानन्धरया अन्तिम दाहसंस्कार म्हिगः लुँतिइ क्वचाःगु दु।

नेपालभाषा मंकाः खलःया छेँय् म्हिगः बुधवाः सुथय् ९ ता ईनिसें १२ ता ईतक अन्तिम श्रद्धाञ्जलि देछायेगु नितिं मदुम्ह मानन्धरया सीम्ह तःगु खः। मदुम्ह मानन्धरयात अन्तिम श्रद्धाञ्जलि देछायेगु झ्वलय् नेवाः न्ह्यलुवा मल्ल के सुन्दरं नेवाः ध्वाँय् फायेकूगु खःसा नेपाल सरकार संस्कृति पर्यटन व नागरिक उड्डयनमन्त्री अनिल कुमार सिन्हां नेपाःया ध्वाँय् फायेकूगु खः।

 

भाषा आयोगया दुजः माननीय मानन्धरयात अन्तिम श्रद्धाञ्जलि देछायेगु ज्याझ्वलय् भाषा आयोगया नायः डा. गोपाल ठाकुरया नं उपस्थिति दूगु खः।मदुम्ह मानन्धरयात अन्तिम श्रद्धाञ्जलि लिपा राजकीय सम्मानया लिसें शवयात्रा यानाः शोभाभगवती कर्णदीपय् थ्यंकूगु खः।मदुम्ह मानन्धरया अन्तिम श्रद्धाञ्जलि देछायेगु व शवयात्राय् थीथी ख्यःया आपालं व्यक्तित्वपिनिगु उपस्थिति दूगु खः।

मदुम्ह मानन्धरया निम्ह काय् व जहान दी।

Categorized in राष्ट्रिय