सुरेश किरण, लहना व जि
विजयरत्न असंबरे | चिल्लागा द्धादशी ११४६, चैत्र २ सोमवाः
सुरेश किरण मानन्धर छम्ह ज्वःमदुम्ह प्रतिभा खः । सुरेश पत्रकार जक मखु । सुरेश भाषा आयोगया माननीय दुजः जक नं मखु । सुरेश छम्ह साहित्यकार नं खः । भाषिक अभियन्ता नं खः। सुरेश व खः, सुरेश थ्व, सुरेश दक्वं खः । भाषिक चिन्तन दुपिं सकसिनं म्हसिउगु नां खः सुरेश । सुरेशयात जिं म्हसिउगु ग्वदँ दत धकाः धाये थाकु । यक्व हे दत । स्वीन्यादँ पीदँ हे दत जुइ।
सुरेशया सम्पादनय् पिहां वःगु विश्वभूमि, सन्ध्या टाइम्स व नेपालभाषा टाइम्सया जि नियमित च्वमि खः । अथे हे तुं नेपालभाषाया पत्रकारिता ख्यलय् पिहां वःगु वाःपौ ‘लहना’ या नं छम्ह जि भिं चितामि खः। लहनाय् यक्व च्वसु च्वया । सञ्चार ख्यलय् दुथ्यंक पलाः न्ह्याका वयाच्वंगु लहनाया पुचलं थःगु घेरा तःचायेका यंकेगु कुतः यात । नेवाः टिभि एच डीइ निगू ज्याझ्वः न्ह्याकल । छगू ज्याझ्वःया नां ‘लहना गतिविधि’ व मेगु ज्याझ्वःया नां ‘लहना साहित्य’ थें च्वं।
थ्व निगू ज्याझ्वः मध्ये गुगु खः लुमं मजू, छगू ज्याझ्वः २५ ब्व पूवंगु लसताय् लहना पुचलं छगू ज्याझ्वः याइगु जुल । जितः नं उगु ज्याझ्वःया निंतिं विशेष पाहां कथं निमन्त्रण वल । व ई जि यलया सौगलय् बासं च्वना च्वनागु ई । व ई कोरोना त्रासया कारणं मनू मनू दथुइ नापलायेगु ग्याःचिकु दुगु ई । ज्याझ्वः यलया गोदवरी जःखः च्वंगु छगू फार्म हाउस भाषा ह्यःमि संस्कृति विद पासा जितेन्द्र विलास वज्रचार्य लिपे स्वापु दुगु जुयाच्वन।
गोदावरी तक वनेत जिके सवारी साधन मदु । व खँ लहनाया नृपेन्द्रलाल श्रेष्ठ नं सिउ। नृपेन्द्र हे जित ज्याझ्वःया न्हि कुन्हु यलय् वयाः कया यंकेगु बचं बिल । बचं कथं उखुन्हु नृपेन्द्रया फोन वल । जित यलया मंगलय् वा हौगलय् लँय् पियाच्वनेत उजं बिल । जिं व उजं पालना यानाः । उमिसं धाःगु इलय् जि हःखाय् पार्किङ न्ह्यःने पियाच्वना । च्यागः झिगः मोटरसाइकल घ्वार्रर्र वयाः जिगु न्ह्यःने दिकेहल । गुगुं मोटर साइकलय् निम्ह निम्ह च्वनावःगु दु । गुगु मोटर साइकलय् छम्ह दु । लिउनेया सिट खालि ।
मोटर साइकल दिके धुंकाः छगःमोटर साइकलं नृपेन्द्र कुहां वल । जित सःतल । लिउने छगू सिट आलि दुगु मोटर साइकल क्यन । जितः उकी च्वनेत उजं बिल । उजं पालना याना । कोरोनाया ग्याःचिकु दुगु जूगुलि मोटर साइकल गयावःपिं सकसिया ख्वालय् मास्क दु । हेल्मेट ला दइगु हे जुल।
जि च्वनागु मोटर साइकल थुवाया नं हेल्मेट दु । ख्वालय् मास्क दु । जि च्वनेधुंकाः मोटर साइकल न्ह्यात । थःगु लँपु लिाना वन । मास्क व हेल्मेटया कारण जिं तिफ्याये मफु कि जि सुयागु मोटर साइकय् च्वना धका।
मोटर साइकल थःगु हे मतापय् न्ह्यानाच्वन । जिपिं दथुइ इलय् ब्यलय् खँल्हाबल्हा जुयातुं च्वन।
वं जिगु बारे बांलाक हे सिउ। यात्राया झ्वलय् जिमि थथी विषय खँ जुल। वयागु सलं नं जिं व सु धकाः तिफ्याये मफु । जिं अनुमान याना कि व मनू जितेन्द्र विलास जुइ ल कि। कि सुरेन्द्रभक्त श्रेष्ठ जुइ ला कि। मेमेपिनिगु नां नं लुमंका । अय्सां तिफ्याये मफु। नुगः वाला वाला मिन हे च्वन । व मास्कया लिउनेया ख्वाः सुयागु जुइ धकाः । बुलुहुँ मोटर साइकल आज्जुइ थ्यन । अर्यात ज्याझ्वः जुइथाय् थ्यन । दिकल । जि न्हापां कुहां वया । अनंलि उगु मोटर साइकल थुवाः कुहां वल । वं थःगु हेल्मेट त्वःतल । अय्नं व मनू वहे धकाः धाये मफु । अनंलिं वं ख्वापातय् च्वंगु मास्क लिकात । मास्क लिकाबलय् तिनि म्हसिल कि लँ दुछि खँ ल्हानाः वयाम्ह जिम्ह सारथी सुरेश किरण मानन्धर खनि।
जिं थ्व खँ अन ज्याझ्वलय् सकसितं न्यंका । सकलें इतिइति न्हिल । जितः छखे अतिकं मछासे च्वन । ख्वाः ला मास्क व हेल्मेट त्वःपुया तल तर सः ला चिर परिचित हे खःसां जिं गथे तिफ्याये मफुगु धकाः मति लुत । उकुन्हुया थ्व घटनाया लिपा लिपा नं पासापिं दथुइ चर्चा जुइबलय् अन न्हिलासु ब्वलनाच्वनी । तसकं सतिम्ह सहकारी सुरेश किरण लिसेया थ्व घटना लिपा लिपा तक नं लुमनाच्वन । उकुन्हु आकाझाकां सुरेश मन्त धकाः न्यनाबल छझा वातांहा जुल । नुगः मछिना वल । मिखा प्याना वल । सुरशे वनीगु ई मत्यनिगु खः । तर वन । अनित्य थ्व संसारय् मृत्यु जक सत्य खः । सत्यया लँपुइ लिना । सुरेशयात थ्व आखलं लुमंका च्वना।
