वरिष्ठ पत्रकार, व्यंग्यकार व कवि सुरेशकिरण मानन्धर शारीरिक रूपय् आः झी नापं मदु । छम्ह सार्वजनिक विशिष्ट बौद्धिक व्यक्तित्वया बिदाइ लिपा झीगु नगुलय् शून्य बोध याकूगु दु। उगु शून्य केवल छम्ह व्यक्तिया जक मखु । थ्व नेपालभाषा पत्रकारिता, साहित्य व पहिचान आन्दोलनं महसुस याःगु तःधंगु क्षति खः । थ्यंमथ्यं प्यंगू दशक ताःहाकःगु पत्रकारिता यात्राय् मानन्धरं च्वसायात केवल पेशा दयेकूगु मखु ।

मानन्धरया पत्रकारिता व च्वसु समाजया सः जक मखुसे अधिकार कायेगु आन्दोलनया छगू शक्ति खः । नेपालभाषा पत्रकारितायात संस्थागत व सशक्त यायेत वय्कलं म्हितादीगु भूमिका लुमंके बहःजू । कठिन राजनीतिक परिवेशय् नं सत्य व पहिचानया पक्षय् च्वसा न्ह्याकेगु अपुगु ज्या मखु ।

तर मानन्धरं गबलें अपुगु लँपु लिनामदी । २०४६ सालया जनआन्दोलनया झ्वलय् जोखिम दथुइ कागु गणेशमान सिंहया अन्तरवार्ता जुइमा वा २०६२÷०६३ या निक्वःगु जनआन्दोलन लिपा संविधान निर्माणया दशकय् संघीयता, पहिचान, समावेशी, समानुपातिकया सवालय् निरन्तर ल्ह्वनाच्वंगु सलं वय्कः निर्भीक पत्रकार प्रमाणित याइ ।

वय्कःया व्यंग्य समाजया विकृति, राज्यया उदासीनता व सांस्कृतिक उपेक्षायात याःगु तीक्ष्ण प्रहार खः। पाठक न्हिलाः नं असहज महसुस याकेगु कथं सत्य उलेगु वय्कःया व्यंग्यया विशेषता खः । पाठकया न्हिला दुने झीगु समाजया यथार्थ सुलाच्वनी ।मानन्धरया मेगु धिसिलाःगु म्हसिका वय्कःया साहित्य खः । वय्कःया कविताय् ईया बेचैनी, समाज प्रतिया आलोचनात्मक दृष्टि व व्यंग्यया माकुगु सवाः दइ । छम्ह पत्रकार वा व्यंग्यकारया रूपय् आपाःस्यां म्हसिउसां वय्कःया सिर्जनात्मक उचाई कविताय् नं विशिष्ट रुपय् खनेदु । थौं वय्कः झी नाप मन्त ।

अथे खःसां नं छगू न्ह्यः झीगु न्ह्यःने दनाच्वंगु दु । वय्कलं थनादीगु न्ह्यसः आः सुनां निरन्तरता बी ? भाषा, संस्कृति व समानुपातिक समावेशी व पहिचानया मुद्दाय् अझ नं राज्यया  संवेदनशीलता कमजोर दु । थज्याःगु इलय् सुरेशकिरण थेंज्याःपिनिगु निर्भीक सःया अभाव अझ महसुस जुइ ।गुलिखें व्यक्तित्वया वास्तविक मू म्वानाच्वंगु इलय् स्वयां मदयेधुंकाः अझ स्पष्ट जुइ । सुरेशकिरण मानन्धर नं अज्याम्ह हे व्यक्तित्व खः, गुम्हेस्यां शब्दयात चेतनाया ल्वाभः दयेकाः छ्यल ।

नेपालभाषा, पहिचान, संघीयता व न्यायपूर्ण समाजया पक्षय् थ्वगु उगु निर्भीक सःयात मौन जुइके मबीगु हे वय्कःयात बीगु धात्थेंया श्रद्धाञ्जली जुइ । छाय्धाःसा वय्कःया शरीर मौन जूसां नं वय्कःया सः अझ थ्वयाच्वनी ।