निर्वाचन आयोगं थ्व हे चैत ५ गते समानुपातिक निर्वाचन प्रणालीं निर्वाचित जूपिं उम्मेदवारतय्त दसिपौ वितरण याइगु जूगु दु। समानुपातिक निर्वाचन प्रणालीपाखे निर्वाचन अधिकृत कृष्णबहादुर राउतया कथं थ्व हे चैत ५ गते सुथंसिया ११ः३० ताःइलय् आयोग लागाय् निर्वाचित जूगु दसिपौ वितरण याइ।

राजनीतिक दलपाखें छनोट जुयाः पेस जूपिं उम्मेदवार तय्गु विवरण आयोगं पितब्वसें निर्वाचित जूगु घोषणा याःगु खः। आयोगं राजनीतिक दलतय्पाखें निर्वाचित जुयादीपिं प्रतिनिधिसभा दुजःतय्त सक्कल नागरिकताया दसिपौ वा राष्ट्रिय परिचयपत्र, निपाः पासपोर्ट साइजया फोटोलिसें विवरण थौं उपलब्ध यायेत इनाप याःगु खः।वंगु फागुन २१ गते जूगु प्रतिनिधिसभा दुजः निर्वाचनय् थी थी खुगू राजनीतिक दलयात राष्ट्रिय दलया मान्यता दूगु खः।

समानुपातिक निर्वाचन प्रणालीपाखे राष्ट्रिय स्वतन्त्र पार्टीं ५७ म्ह, नेपाली कांग्रेसं २० म्ह, नेपाल कम्युनिष्ट पार्टी(एमालें) १६ म्ह, नेपाली कम्युनिष्ट पार्टी (नेकपां) ९ म्ह, श्रम संस्कृति पार्टीं ४ म्ह व राष्ट्रिय प्रजातन्त्र पार्टीं प्यम्ह त्याःगु खः।मुक्कं २७५ दुजःया प्रतिनिधिसभाय् प्रत्यक्ष निर्वाचन प्रणालीपाखें १६५ व समानुपातिक निर्वाचन प्रणालीपाखें ११० म्ह निर्वाचित जुइगु व्यवस्था दु।

निर्वाचन आयोगं समानुपातिक निर्वाचन प्रणालीपाखेया उम्मेदवारतय्त दसिपौ वितरण याये धुंकाः थुगुसीया निर्वाचन प्रक्रिया पूवनी।

Categorized in राष्ट्रिय