राष्ट्रपति रामचन्द्र पौडेलयात निर्वाचन आयोग नेपालं वंगु फागुन २१ गते क्वचाःगु प्रतिनिधिसभा दुजः निर्वाचन २०८२ या प्रतिवेदन पेस याःगु दु।

राष्ट्रपति पौडेलयात राष्ट्रपति भवन शितल निवासय् थौं ग्वसाः ग्वःगु ज्याझ्वलय् आयोगया कार्यवाहक प्रमुख आयुक्त रामप्रसाद भण्डारीं उगु प्रतिवेदन पेस यानादिल।

उगु झ्वलय् राष्ट्रपति पौडेलं कठिन व जटिल परिस्थितिइ नं मन, बचं व कर्मं चान्हि मधाःसे जुयाः निर्वाचन सफल जुइक क्वचाःगुलिं लसता प्वंकादिल। वय्कलं निर्वाचन सफल जुइक पूवंकूगुलिं निर्वाचन आयोग, राष्ट्रसेवक कर्मचारीलिसें सम्बद्ध फुक्क पक्षतय्त सुभाय् बियादिल।

“फागुन २१ गते प्रतिनिधिसभा दुजः निर्वाचन स्वतन्त्र, निष्पक्ष व भयमुक्त वातावरणय् पूवंकाः आयोगं थःगु भाला सफल जुइक पूवंकूगु दु, गुकिं निर्वाचन आयोग व निर्वाचन प्रणालीप्रति आम नागरिकतय्गु विश्वास अभिवृद्धि जुयाः लोकतन्त्र अझ क्वातूगु जिं तायेकागु दु,” राष्ट्रपति पौडेलं धयादिल।

Categorized in राष्ट्रिय