नेपालभाषा पत्रकारिता ख्यःया अभिभावक सुरेश
श्रीकृष्ण महर्जन नेवाः | चौलाथ्व नवमी ११४६, चैत्र १३ शुक्रवाः
नेपालभाषा पत्रकारिता ख्यःया निंतिं सुरेश किरण मानन्धर न्हूगु नां मखु। सुनां नं वय्कःया ब्यक्तित्वया बारे कना च्वनेमाःगु नं मदु। नेपालभाषा पत्रकारिता ख्यःया बारे छुं न्यनेमाःसां, छुं थुइकेमाःसां, छुं सीकेमाःसां, छुं च्वयेमाःसां बाय् सुयाथाय् न्ह्यःने कनेमाःसां नं नेपालभाषा पत्रकारिता ख्यलय् सकलसिगु म्हुतुं नं पिहां वइम्ह सुरेश किरण मानन्धर। नेपालभाषा पत्रकारिता यानाच्वंपिंसं थःत छुं नं कथंया ज्या मछिंगु महसुस जुल धाःसां बाय् अलमल जुल धाःसां नं लुमंकीम्ह ब्यक्तित्व धैगु सुरेश किरण मानन्धर हे खः।
थनि करिव स्वंगू दशक न्ह्यःनिसें वय्कःलिसे मदिक्क नापं दु । गबलें भौतिक रुपं हे न्हियान्हिथं निश्चित ई नापं च्वनाः ज्या यायेगु यानासा । लिपांगु इलय् वयाः आधुनिक प्रविधियात अनलाइनय् च्वनाः सहलह ब्याकेगु ज्या याना । करिब न्हियान्हिथं धइथें प्रविधियात छ्यलाः स्वापू तयेगु ज्या जुयाच्वंगु खः । गबलें फोनंसा गबलें मेसेन्जरं लगायतया माध्यमं । छुं नं कथंया देशय् हिउपाः वल धाःसा बाय् नेवाः ख्यःया बारे सहलह ब्याकेमाःसां, पत्रकारिता ख्यलं यायेमाःगु ज्यायात कया न्यनेकने व सहलह ब्याकेगु याना वयाच्वनागु खः । न्हिया न्हिथंया समाचारया निंतिं सहलह जुइगु ला जु हे जुल । व नाप नापं नेवाः ख्यलय् न्हूगु कथंया सोच, नेवाः समाजया बारे व किपूया बारे जक मखु नेवाःतय्गु मंकाःगु खँयात च्वयेगु च्वसु मालेवं हे वय्कलं फोन यानादी । गुथि विधेयक विरुद्धया आन्दोलन, न्हापांगु अन्तर्राष्ट्रिय नपालभाषा सहित्य सम्मेलन, दाफा महोत्सव, नेवाः पत्रकार राष्ट्रिय दबू, नेवाः संस्कृति संस्कार, नेवाः अधिकार, नेपाःया आदिवासी पत्रकारिताया सवालंनिसें नेवाः नापं आदिवासी हक अधिकारया सवालयात कयाः ‘सन्ध्या टाइम्स’ न्हिपौ लिपा वनाः ‘नेपालभाषा टाइम्स’ न्हिपौ, ‘गोरखापत्र’ न्हिपौया ‘नयाँ नेपाल’ पेज (नेपालभाषां पिदनीगु) अले अमेरिका लगायत थीथी देशय् दुपिं नेवाःतय्सं पिथनिगु लुमन्ति पौ बाय् छुं नं पौया निंतिं च्वसु मालेवं जित फोन याना हयादीम्ह ब्यक्तित्व सुरेश किरण मानन्धर खः । वय्कलं गुगु नं इलय् फोन याना हइगु अवस्थाय् अले वय्कलं थ्व छगू च्वयेमाली धकाः धाइगु इलय् गबलें नं लिफः स्वयेगु ज्या मयान । वय्कः थःगु छेँजः व थःथितियात तकं प्राथमिकताय् मतःसे नेपालभाषा, नेवाः ख्यः व नेपालभाषा पत्रकारिता ख्यलय् ज्वःमदुगु योगदान यानादीम्ह, सकलसिगु साझा अर्थात मंकाः ब्यक्तित्व जूगुलिं हे खः । नेवाः ख्यः व नेपालभाषा पत्रकारिता ख्यःयात न्ह्याबलें सकारात्मक रुपं कया वयाच्वनादीम्ह वय्कः सुरेश किरण मानन्धरयात नेपालभाषाया अभिभावक व नेवाः ख्यःया निंतिं दुने च्वना भूमिका म्हिता वयाच्वनादीम्ह अले सकलसित प्रेरणाया बियादीम्ह ब्यक्तित्व खः धकाः थौं नेपालभाषा पत्रकारिता यानाच्वंपिं जक मखु मेमेगु भाषां पत्रकारित यानाच्वंपिं जूसां नेवाः पत्रकारपिंत न्यन धाःसा छप्वः हे म्हुतु धाइ ।
नेपालभाषा पत्रकारिता यानाच्वंपिं सकलसिनं चाहे व थकालीम्ह हे ज्याथःम्ह हे छाय् मजुइमा, चाहे नकतिनि जक पत्रकारिता ख्यलय् वयादीम्ह छाय् मजुइमा सकलसिनं हे सुरेश दाई धकाः धाइम्ह ब्यक्तित्व सुरेश किरण मानन्धर खः । वय्कलं नेपालभाषाया साहित्य ख्यः, नेवाः न्ह्यलुवाःया भूमिका, नेवाः व गैरनेवाः पत्रकारिताया दथुइ स्वापू तयेगु निंतिं नं तःधंगु भूमिका म्हितादीगु दु।
नेवाः पत्रकार राष्ट्रिय दबू पलिस्था यायेगु निंतिं सहलह जूगु इलय् तसकं सकारात्मक रुपं कया हःपाः बियादीम्ह ब्यक्तित्व वय्कः सुरेश किरण मानन्धर खः । फुक्क कथंया स्वार्थयात त्वःताः नेपालभाषाया निंतिं व नेवाःतय्गु निंतिं देय्न्यंकंया नेवाः पत्रकारितय्त छगू हे संगठनय् हयेफत धाःसा थ्व तःधंगु उपलब्धी जुइ धकाः तायेका सल्लाह सुझाव बियाः छगू कथं अभिभावकत्वया भूमिका म्हितादीगु दु । थः स्वयं नेपालभायाया छगूयां छगू जक न्हिपौ ‘सन्ध्या टाइम्ह न्हिपौ’या सम्पादक जूगु ल्याखं नेपालभाषा पत्रकारिता ख्यःया पुलांपिं अथे हे नेवाः न्ह्यलुवातय्त नेवाः पत्रकार राष्ट्रिय दबूप्रति सकारात्मक सोच दयेके बिइगु निंतिं भूमिका म्हितादीगु दु । नेवाः पत्रकार राष्ट्रिय दबुया हरेक गतिविधिइ सक्रिय ब्वति कयाः नेवाः पत्रकार राष्ट्रिय दबू दयेकेगु ज्या यानादीपिं नेवाः पत्रकारपिंत पलिस्थाया कालंनिसें छगू बांलाःगु संगठन खः धकाः क्यनेगु व सुं मनू कन्फ्युज जुल धाःसा थुइका बिइगु ज्या तकं यानादी । अथे हे नेवाः पत्रकार राष्ट्रिय दबुलिइ छुं नं कथंया आन्तरिक वा बाहिय कथंया पंगःत वल बाय् विवादत ज्यंकेमाःगु, समस्या वःगु व न्हूगु कथंया ज्या यायेमाःगु अवस्था वल धाःसां पत्रकार दबूया नेतृत्वय् दुपिं सकलसिनं सुरेश दाई धकाः वय्कःयात हे लुमंकेगु याना वयाच्वंगु खः।
नेपालभाषा पत्रकारिता ख्यःया बारे गनं नं चर्चा यायेमाल धाःसा नेपालभाषा पत्रकारिता ख्यलय् नं न्ह्यब्वये बहःम्ह ब्यक्तित्व धकाः क्यने माल, खँ तयेके माल धाःसां नेवाः पत्रकार राष्ट्रिय दबूपाखें वय्कः सुरेश किरण मानन्धरया नां हे यंकेगु यानाच्वंगु खः । नेपाःया पत्रकारिता ख्यलय् समावेशीयात सवालय् खँ यक्वसिनं ल्हानाच्वंगु जूसां नं बास्तवय् भाषिक समावेशीयात त्वःताः वने मज्यु धकाः थःगु खँ मदिक्क तयाः मेपिंत कन्भेन्स तकं यानादीम्ह ब्यक्तित्व खः । उकिं प्रेस काउन्सिल थेंजाःगु सरकार व पत्रकारित ख्याःया आधिकारीक संस्थापाखें पिकाइगु पत्रकारिताया आचार संहिता लगायत पिथना तकं नेपालभाषां पिकायेत सफल जूगु खः । अथे पत्रकारिता ख्यः नाप स्वापू दुगु सवालयात कया नेपालभाषांपाखें भाय् हिलेगु ज्या वय्कलं यानादीगु धैगु नेपालभाषा पत्रकारिता ख्यःया निंतिं तःधंगु योगदना खः । पत्रकारित ख्यलय् नेपालभाषा पत्रकारिता ख्यःया बारे च्वयेमाल धाःसां, कनेमाल धाःसां सुरेश किरणयात हे न्ह्यब्वयेगु ज्या याना वयाच्वंगु दु । लिपांगु इलय् भाषा आयोगया माननीय दुजः जुयादीसां नं वय्कलं नेवाः पत्रकार राष्ट्रिय दबू व नेवाः पत्रकारिता ख्यःया निंतिं उलि हे सक्रियता क्यनादीगु खः । उकिं वय्कः बास्तवय् नेपालभाषा पत्रकारिता ख्यः अले नेवाः पत्रकारिताया निंतिं नं अभिभावक हे खः।
सुरेश किरण मानन्धर नेपालभाषा पत्रकारिता ख्यःया निंतिं साझा मनू अले नेपालभाषा पत्रकारिता ख्यलं मेपिंथाय् न्ह्यब्वये बहःम्ह ब्यक्तित्व कथं नाला वयाच्वंगु खः । थौं वय्कः सुरेश किरण मानन्धर मदुगुलिं दकलय् तःधंगु क्षति नेपालभाषा पत्रकारित ख्यलय् जूगु दु । नेपालभाषा पत्रकारिता ख्यलय् वय्कलं यानादीगु योगदान ताः ई तक अवश्य नं ल्यनाच्वनी । वय्कःया योगदानयात ताः ई तक ल्यंका तयेगु, वय्कःया मदयेधुंकूसां नं प्रेरणाया श्रोतया रुपय् नाला कायेगु व नेपालभाषा पत्रकारिता ख्यःया छगः थीगु नगुया कथं नाला कायेगु खःसा पत्रकार सुरेश किरण मानन्धरया नापं सिरपाः पलिस्था यायेगु छगू ज्या जुइफु । अथे हे पत्रकारिता ख्यलय् वय्कःया योगदानयात कयाः नेवाः पत्रकारपिं नापनापं खस नेपाली भाषाया व आदिवासी जनजाति व थीथी भाषाया पत्रकारपिंपाखें मदुम्ह सुरेश किरण मानन्धया बारे च्वके बिया लुमन्ति पौ पिकायेगु ज्या यायेमाःगु दु । अथे हे नेपालभाषा पत्रकारिता ब्वनिपिंत वय्कःया नामं छात्रावृत्तिया व्यवस्था यायेफइ । उगु हे कथं नेपालभाषाया पत्रकारिता नापं मातृषाया पत्रकारिता नापनापं समग्र पत्रकारिताया सवालय् थीथी ब्यक्तित्व पिनिगु बारे सरकारी बाय् गैरसरकारी संस्थापाखें छुं नं कथंया पिथना बारे योगदानया बारे चर्चा जुइगु इलय् सुरेश किरणया बारे नं खँ थ्यंकाः बिइगु ज्या नेपालभाषा पत्रकारिता यानाच्वंपिसं यायेमाःगु आवश्यकता दु।
