लोकेश्वर आर्याअवलोकितेश्वर लोकेश्वर करुणामय जनबहाःद्यःया खः सालाः असनय् थ्यंकेधुंकाः बिहिबाः बहनि राष्ट्रपति रामचन्द्र पौडेलं खःया पुजा लिसें दर्शन यानाः प्रसाद ग्रहण यानादीगु दु।

असनय् बहनि थ्यंमथ्यं १० ताः इलय् वय्कलं तुयुम्ह लोकेश्वर आर्याअवलोकितेश्वर लोकेश्वर करुणामय जनबहाःद्यःया दर्शन लिसें द्यः पुज्यानादीगु खः। जनबहाःद्यःया खः सालाः असननय् थ्यंगु बहनि राष्ट्राध्यक्षं असनय् वनाः पुजा लिसें दर्शन यानाः प्रसाद ग्रहण यायेगु परम्परा दयाच्वंगु दु।येँया तीनधारा पाठशाला जमः न्ह्यनं ३२ ल्हाः ताः हाकःगु खः दयेकाः चैतेदसैँया दिं निसें सालेगु यानाच्वंगु दु।

थ्व खःयात नागराजया चिं कथं कायेगु याः। दँय् दसं थ्व जात्रा न्यायेके धुंकाः वा वइगु व सहकाल जुइगु धार्मिक विश्वास दु। खः निन्हु कुन्हु थौं असनं हनुमानध्वाखाय् च्वंगु कालभैरव न्ह्यने तक थ्यंकी। स्वन्हु कुन्हु हनुमानध्वाखां लगमय् थ्यंकाः जात्रा याइगु परम्परा दु। लगमय् जनबहाः द्यःया मांया देगःयात स्वकः तक खँ चाःहिकेगु याइ। येँय् जनबहाः द्यःया जात्रा क्वचाये धुंकाः यलय् बुंगः द्यःया खः जात्राया न्ह्याइगु परम्परा दयाच्वंगु दु।

दँय् दसं चैत्र शुक्ल अष्टमीया दिं जमःया तीनधारा पाठशालां न्ह्याइगु वर्षा लिसें सहकालया द्यःतुयुम्ह लोकेश्वर आर्याअवलोकितेश्वर लोकेश्वर करुणामय जनबहाः द्यःया खः यात्रा न्ह्याःगु दु। खः यात्राय् द्वलंद्वः भक्तजनतय्सं ब्वति काःगु दु। खः जात्राया निंतिं बिहिबाः सनिलया ५ ताः इलय् जनबहालं द्यःयात खतय् तयाः गुर्जुपिंसं क्वबिनाः वंघः, थाय्मदु, न्हाय्कंत्वाः, असं–कमलाछि जुकाः जमलय् च्वंगु तीनधारा पाठशालाया न्ह्यने थ्यंकूगु खः।

वैदिक पुजा लिपा खतय् पलिस्था यानाः तुयुम्ह लोकेश्वर आर्या अवलोकितेश्वर लोकेश्वर करुणामय जनबहाः द्यःया खःयात सालाः असनय् थ्यंकूगु खः।थुगु लागाय् स्वन्हुतक खः जात्रा न्ह्याइ। असं, वसन्तपुर, जैसीदेगः जुकाः लगमय् तक खतय् साला यंकाः जनबहाः द्यःयात हाकनं चिधंगु खःचाय् तयाः क्वबिना हयाः जनबहालय् लित हयाः पलिथ्या यायेधुंकाः थुगुसीया जात्रा क्वचाइगु परम्परा दु।

चैत्र शुक्ल अष्टमीया दिं बिहिबाः कुमारी द्यःयात नापं तीनधारा पाठशाला लागाय् यंकाः रथजात्रा न्ह्याकूगु येँ महानगरपालिका–२५ या पुलांम्ह अध्यक्ष नापं जुयादी धुंकूम्ह गुर्जु नीलकाजी शाक्यं राससयात जानकारी बियादिल।

Categorized in राष्ट्रिय