सुरेश छम्ह कल्पबृक्ष खः
सुरेन्द्रभक्त श्रेष्ठ | चौलाथ्व दशमी ११४६, चैत्र १४ सनिवाः
नेपाःया भाषा, कला, साहित्य, संस्कृति, सम्पदा व संचार ख्यलय छगः थीगु नगु खः– सुरेश किरण। न्ह्याबलें न्हिला च्वनीम्ह, मेपिनिगु सुख दुःखय् ग्वाहाली याइम्ह, सुनां छुं धाःसां मस्यू अले म्हाः मधाइम्ह छम्ह ज्वमलाःम्ह कवि, वरिष्ठ पत्रकार खः सुरेश किरण। छमां कल्पबृक्ष सिमा खः माःमाःपिंत माःमाःगु सामग्री उपलब्ध याकेफूम्ह तःफागु नुगः दुम्ह अले सकसिगु नुगलय च्वनेफुम्ह ब्यक्ति खः – सुरेश किरण ।
थौंसिबें ३६ दँ न्ह्यः जि बिश्वभूमि न्हिपौया ज्याकुथी केलत्वालय ज्या यायेत वनागु खः । जि उबलय् १६ दँ तिनी दुम्ह खः। जितः आः मदयेधुंकुम्ह पासा नरेशकुमार शाक्यं बिश्वभूमी पत्रिकाय ज्या यायेत यंकूगु खः। उबलय् नरेशं मेशिन चले याइगु खःसा जिं कम्पोज यायेगु खः । उगु इलय आः थें कम्प्युटर चले यायेगु चलन मदु । छगः छगः म्हया आखः मिले यानाः कम्पोज यानाः पेज दयेकेगु खः।
जि बिश्वभूमिइ ज्या याःवनागु इलय जि, ज्ञानराम श्रेष्ठ, दीपक शाक्य स्वम्हेसिनं कम्पोज यायेगु खःसा नरेशकुमार शाक्य, प्रकाश शाक्य, भूपेन्द्र तुलाधरपिसं मेशिन चले याइगु खःसा सुरेश किरण सम्पादक। सुजीब वज्राचार्यं सम्बाददाता लिसे रेखदेख याइगु खःसा सुशील वीर सिं कंसाकार पत्रिकाया ब्यवस्थापक खः । उबलय् सुशील वीरं दक्वसित म्हसिकेगु झ्वलय सुरेश किरणयात क्यनाः वयकः थुगु पत्रिकाया सम्पादक जुयादी धकाः धाःबलय् जिं ला पत्या हे मजुया । छायधाःसा सुरेश ला जि सिबें नं मचाम्ह थें च्वं । थुज्वःम्ह मचाम्ह नं थज्याःगु न्हिपौया सम्पादक जुइ फैला धकाः मनय् वःगु खः। तर लिपा सुरेश नापनापं ज्या यानाः वंलिसे तिनी वयकः मेहेनती व गुण दुम्ह ब्यक्ति खः धकाः सिल । छुं नं खँ न्यं वन धाःसा ध्वाथुइक उकिया लिसः बी। सुरेशं यानाः हे थौं जिं ब्याकरण शुद्धाशुद्धी यानाः च्वयेफूगु खः।
सुरेश छम्ह थज्याम्ह ब्यक्ती खः– मेपिंसिबे तसकं हे फरक दु छाय्धाःसा सुरेशया ल्हाः व दिमाग नितां हे छक्वलं चले जू । बुखँ च्वया च्वनीबले सुनां नं फोन यानाहल धाःसा फोनय् मज्जा खँ ल्हानाच्वनीसा बुखँ नं ल्हातं निरन्तर मदीकूसे च्वयाच्वनी । खँ ल्हानाच्वंगु बिषय छता जुयाच्वनीसा बुखं मेगु हे बिषयसं तयार यानाच्वनी । भाषा कला, साहित्य, संस्कृति, सम्पदा लिसे वरिष्ठ पत्रकार जक मखुसे सुरेश छम्ह ब्रिलियन्त ब्यक्ती नं खः । बि. सं. २०४८÷४९ सालपाखे प्रधानमन्त्री गिरिजाप्रसाद कोइरालाया पालय् ‘टनकपुर काण्ड’या आन्दोलन जुयाच्वंगु इलय असनय् गोली कयेकाः मनू स्यायेधुंकाः ‘कफ्र्यु’ जूगु इलय् बिश्वभूमी न्हिपौ सन्ध्या इलय् व सुथय् यानाः निगू संस्करण पिदंगु खः । उगु इलय् सुथंनिसें ज्या यानाः सन्ध्याकालीन पत्रिका पिथनेगु खःसा चच्छी ज्या यानाः सुथयया संस्करण पिथनेगु खः । उबलय् जिपिं सकसिनं न्हिछी चच्छी ज्या यायेगु खः । उबलय् जिपिं कम्पोज याइपिं व मेशिन चले याइपिं भ्वं कटिङ यानातथाय् छुं ई आराम कायेगु खःसा सुरेश मेचय् हे आरामं द्यनीगु खः । सुरेशं बुखँ च्वये सिधयेकल ला धकाः स्ववनेबलय् मेचय हे भगवान बुद्धं ध्यानय च्वनाबिज्याम्ह थें आनन्दं कलम बुखं च्वयाच्वम्ह थें ल्हाः दिकाः द्यनाच्वनी । सुरेशयात न लासा फांगा हे माः न खाता हे माः सिर्फ भतिचा शरीरयात झासु लने दःसा गाः ।
सुरेशयाके दुगु मेगु गुण छु धाःसा जिमिसं बुखँ सिधल ला धकाः काःवंसा गुलि च्वयागु खः भ्वं खुनाः बुखँ च्वयातःगु बियाहइगु खःसा छुं ई लिपा हाकनं काःवनेबलय् द्यनाच्वम्हेसिनं न्हापा गुलि तक च्वयातगु खः अनं लिपाया त्वःमफिक छसिकथं बुखँ मिले यानाः च्वयेफुम्ह ज्वःमलाम्ह ब्यक्ति खः सुरेश ।
बि। सं २०४७ निसें २०५२ खुदँ तक सुरेशनाप ज्या यानागु खःसा जितः थौं थुगु अवस्थाय् थ्यंकेत सुरेशया तःधंगु ल्हाः दु । छाय्धाःसा बिश्वभूमिइ ज्या याःवनागु इलय् जि १६ दँ तिनी दुम्ह खः । उबलय् जिगु स्वभाव हे कडा अले फुक्कलिसे ल्वानाः जक जुइगु खः । सुं नापं ग्याइम्ह मखु अले भ्हउबलम खँ न्यनेगु नं मखु । यःसा ज्या याःवनेगु मन मदुसा ज्या या मवंसें चाःह्यू वनेगु । जिगु थुज्वःगु बानी खनाः छन्हू सुरेशं जितः छगू न्ह्यसः न्यन – छ ग्वःदँ दत अले छंगु छेँय् सु सु दु ? सुरेश दाइ जि १६ दँ दत । जिमि प्यंम्ह दाजुकिजा दु जि साहिलाम्ह, छम्ह तता अले बा व मां । जिं लिसः बिया । छ साहिलाम्ह काय् जूगुलिं छन्त दक्वसिनं माया मतिना याःगुलिं छं छुं हे ब्यवहार याये मसिउ खनी धकाः ह्वाररर न्हिल । जिगु बानी ब्यवहार छु मिले मजुल सुरेश दाइ धकाः न्यना ।
छं सु नाप गथे यानाः खँ ल्हायेगु धकाः हे मसिउ अले थः यत्थे यानाजुया जिइ ला ? लिपा नं छं थथे याना जुल धाःसा याकःचा जुइ धकाः धाल । जिन्दगीइ छम्ह मनू दयेकेत अथवा पासा यायेत दँदँ मालीसा सुं नापं ल्वानाः छुटे जुइत छुं सेकेण्डं हे जुइफु उकिं छन्हू झी सिइमानी फुक्कं मापं न्हिलाः सकसित ग्वहाली यानाः म्वायेफत धाःसा जक म्वानागुया अर्थ दइ । मखुसा आः नं झी सिनाः म्वानाच्वंपिं थें जक जुइ धकाः सुरेशया थुज्वःगु मार्मिक खँंग्वलं थौं जिगु जिवनय् ह्यूपाः हयेत जि सफल जूगु दुसा थुकिया श्रेय सुरेश हे खः ।
सुरेश थौं सिबें निदँ न्ह्यः भाषा आयोगया दुजलय् नियुक्ति जूगु खः । नेवाः ख्यः जक मखु नेपाःया हे भाषा आन्दोलनय ज्या यानाः झी सकलसिगु नुगः नुगलय् च्वनेफूम्ह छम्ह बहुप्रतिभाशाली ब्यक्तित्व खः सुरेश । थौं सिबें स्वला प्यला न्ह्यः नेवाः पत्रकार दबूया केन्द्रीय कमितिया मुँज्या धाडिङया जीवनपुरय् वन्दे रिसोर्टय च्वंवनागु खः । निन्हूयंकं जूगु उगु मुँज्याय सुरेश सल्लाहकार जुयाः ब्वतिकागु खःसा दबू थकायेत यक्व हे बांबांलाःगु सल्लाह सुझाव ब्यूगु खः । छुं ई न्ह्यः तिनी बौद्ध युवा कमिटीया ग्वसालय् यलया ताम्राकार समाजय् जूगु छगू ज्याझ्वलय् प्रशिक्षकया रुपय् नापलानागु खः । व हे भौतिक रुपं नापलागु अन्तिम न्हि जुयाबिल ।
मातृभाषा आयोगं थुगुसी निसें मातृभाषा दिंया लसताय छगू सिरपाः बीगु निर्णय याःगु खः । उकिया निंतिं सुरेशं जिमित फाराम भरे यानाः छ्वयाहजी धकाः धाःगु खः । उकिं जि, नृपेन्द्रलाल श्रेष्ठ , राजु नापित, रत्न मन, नेवाः पत्रकार दबूपाखें फाराम भरे यानागु व सुरेशयात जानकारी बियागु खः । लिपा थुगुसी नेपालभाषा मंकाः खलःयात थुगु सिरपाः बीगु निर्णय जूगु जानकारी सुरेशं ब्यूगु खःसा लिपालिपाया दँय् नं थथे यानाः हे फाराम भरे यानाच्वं झीतः नं सिरपाः लायेफु धकाः खँ जूगु खः । उगु खँल्हाबल्हा हे सुरेश नाप जूगु लिपांगु खँल्हाबल्हा जुल । वंगु फागुन २५ गते सोमवाः अकाझाकां मदुगु खबरं थौं तक जितः झस्के यानाच्वंगु दनि । भौतिक रुपं झीत त्वःतावंसा सुरेशया न्हिलासू, बिचाः व सल्लाह झीगु मनमस्तिकय् न्ह्याबलें चा हिला हे च्वनी । सुरेश न्ह्याबलें अमर व अजर हे जुयाच्वनी ।
