नेपाःया न्यायिक इतिहासय् निक्वःखुसी मिसां नेतृत्व यायेगु ह्वःताः वःगु दु। सर्वोच्च अदालतया वरिष्ठतम् न्यायाधीश सपना प्रधान मल्लं थौनिसें कायममुकायम (कामु) प्रधानन्यायाधीशकथं भाला कःघानादिल।

थ्वस्वया न्ह्यः, न्हापांखुसी न्यायिक नेतृत्वया इतिहासय् मिसा प्रधानन्यायाधीश कथं सुशीला कार्कीं नेतृत्व यानादीगु खः। प्रधानन्यायाधीश प्रकाशमानसिंह राउत ६५ दँया उमेरहदं यानाः मङ्गलबाः सेवानिवृत्त जुइधुंकाः वरिष्ठतम् न्यायाधीश मल्लया ब्वय् कामु प्रधानन्यायाधीशया भाला वःगु खः।

प्रधानन्यायाधीशया पद खालि जूसा सर्वोच्च अदालतया वरिष्ठतम् न्यायाधीशं कायममुकायम प्रधानन्यायाधीशया भाला कःघायेगु संवैधानिक व्यवस्था दु। नेपाःया संविधानया धारा १२९ (६) य् प्रधानन्यायाधीशया अवकाश लिपा वरिष्ठतम् न्यायाधीशं स्वतः कामु प्रधानन्यायाधीश जुइगु व्यवस्था यानातःगु खः।

न्याय परिषदं वंगु फागुन २६ गते प्रधानन्यायाधीश जुइत योग्यता गाःपिं सर्वोच्च अदालतया खुम्ह न्यायाधीश तय्गु धलः संवैधानिक परिषदय् छ्वःगु खः। प्रधानन्यायाधीशया निंतिं परिषदं वरिष्ठतय् न्यायाधीश मल्ललिसें, न्यायाधीशत कुमार रेग्मी, हरि फुँयाल, डा मनोजकुमार शर्मा, डा नहकुल सुवेदी व तिलप्रसाद श्रेष्ठया नां सिफारिस याःगु खः।

नेपाःया संविधान कथं, सर्वोच्च अदालतय् स्वदँ न्यायाधीश जुइधुंकूम्ह व ६५ दँ मदुनिपिं प्रधानन्यायाधीश जुइत योग्यता गाःपिं धाइ। प्रधानन्यायाधीशया पद खालि जुइस्वयां लच्छिन्ह्यः हे संवैधानिक परिषदं न्हूम्ह प्रधानन्यायाधीशया नां प्रस्ताव यायेमाः। तर प्रतिनिधिसभा विघटन जुइधुंकाः संवैधानिक परिषद्या बैठक च्वनेफूगु मदुनि।

सभामुख, उपसभामुख, प्रमुख विपक्षी दलया नेतातय्गु पद खालि जुयाच्वंगुलिं संवैधानिक परिषदं न्हूम्ह प्रधानन्यायाधीशया नां सिफारिस यायेमफूगु धाःगु खः। संसदीय सुनुवाइ विशेष समितिइ संसदीय सुनुवाइं अनुमोदन जुइधुंकाः जक हे राष्ट्रपतिं प्रधानन्यायाधीश नियुक्ति याइगु व्यवस्था दु। प्रतिनिधिसभाया निर्वाचनलिपा संसद्या अधिवेशन बिहीबाः निसें सुरु जुइगु व सभामुख÷उपसभामुखया निर्वाचनया प्रक्रिया सुरु जुइ ल्यंदनिगुलिं सुनुवाइ समितिया गठन यायेत अझ नं छवाः निवाः ई काइगु खनेदु।

Categorized in राष्ट्रिय