भाषाविद्, नेपाल संवत न्हूदँ राष्ट्रिय समारोह समितिया सचिवालय दुजः, नेवाः न्ह्यलुवाः विष्णु चित्रकारया दाहा संस्कार थौ क्वचाःगु दु।

चित्रकार म्हिगः सोमवाः सुथय् ३ ताः इलय् मुस्ताङय् नुगःचुया ल्वचं मदुगु खः। वय्कःया सीम्ह थौं मंगलवाः सुथय् येँय् हःगु खः।

मदुम्ह चित्रकारया सीम्ह अन्तिम श्रद्धाञ्जलि देछायेगु नितिं थौं मंगलवाः सुथय् ८ ताः ईनिसें १० ता ई तक जगतसुन्दर ब्वनेकुथिइ तःगु खःसा मदुम्ह चित्रकारयात जगतसुन्दर ब्वनेकुथिया दुजःपिं, नेपालभाषा मंकाः खलःया दुजःपिं, नेवाः देय् दबूया दुजःपिं, नेवाः ग्वाहालि पुचःया दुजःपिं व न्हूदँ समारोह समितिया दुजःपिन्सं श्रद्धाञ्जलि देछाःगु खः।

अथेहे, श्रद्धाञ्जलि देछायेगु नितिं पुलांम्ह प्रधानमन्त्री लिसें मदुम्ह चित्रकारया जिलाजं झलनाथ खनाल, नेकपा एमालेया नेता सुरेन्द्र पाण्डे, कृष्णगोपाल श्रेष्ठ, अष्टलक्ष्मी शाक्य, अमृत बोहरालिसेंया नेतापिं उपस्थित जूगु खःसा मदुम्ह चित्रकारं नेपाःया राजनीतिइ यानादीगु योगदानयात स्मरण यासें एमाले नेता सुरेन्द्र पाण्डें थःगु नुगःखँ तयादीगु खः।

अथेहे, अन्तिम श्रद्धाञ्जलि देछायेगु नितिं नेवाः न्ह्यलुवाः मल्ल के सुन्दर, डा. महेशमान श्रेष्ठ, राजेन्द्र श्रेष्ठ, न्हूदँ समारोह संरक्षण समितिया नायः प्रा.डा. नरेशमान बज्राचार्य, न्हूदँ समारोह ११४६ या नायः प्रेमहिरा तुलाधर, जगतसुन्दर ब्वनेकुथिया प्रिन्सिपल सुनिता मानन्धर, नेपालभाषा मंकाः खलःया नायः रमेशमान पिया, नेवाः देय् दबूया नायः रश्मिला प्रजापति, ज्यापु महागुथिया नायः सत्यनारायण डंगोल, जनकलाकार वीरप्रसाद भन्सारीलिसें थीथी ख्यःया व्यक्तिपिं उपस्थित जूगु खः।मदुम्ह चित्रकारया अन्तिम संस्कार लुति जूगु खः।

७६ दँया विष्णु चित्रकारया छम्ह म्ह्याय् व जहान दी।

Categorized in राष्ट्रिय