येँ महानगरपालिकां निसः दँ पुलांगु गगनेश्वर देगःया पुनर्निर्माणया ल्यंगु ज्या पूवंकीगु जूगु दु।प्रदेश सरकारपाखें वःगु ध्यबां निर्माण न्ह्याकूगु खःसां ध्यबा मगाःगुलिं जगय् हे ज्या दिनाच्वंगु येँ महानगरं वडा नं ३२ य् लाःगु गगनेश्वर महाद्यःया देगःयात स्वतजालिसें पूवंकेत्यंगु खः।

येँ महानगरं सम्पदा लिसें पर्यटन समितिया कजि आशामान सङ्गतया कथं थ्यंमथ्यं निसः दँ पुलांगु उगु देगः १९९० सालया तःभुखाचं पूवंकं क्षति जूगु खः। थुकिया पुनर्निर्माणया सन्दर्भय् पुरातत्व विभागपाखें इलय् हे निर्णय जुयाः मफुगु विषय ल्ह्वने धुंकाः सम्पदा लिसें पर्यटन समितिया कजि सङ्गतं लिखित दस्तावेज मदुसा गुठियार, जनश्रुति, कथन, सामाजिक विश्वास लिसें मान्यतायात लिधंसा कयाः दयेकाः पुरातत्व विभागं निकास बिइमाःगु धयादिल।

“जिमित निकास माःगु खः। ध्यबा खर्च यानाः जिमिसं ज्या याये, अथे खःसां पुरातत्व विभागं बाय् थ्व त्वः तयाः पनेगु बाय् दयेके मबीगु यायेमज्यु। भचा भचा ई पियाः प्रक्रिया पूवंकेत जिपिं तयार दु। अथे खःसां प्रक्रिया पूवंकेगु नामय् लांलांतक बाय् दंबदंतक प्रक्रिया अवरुद्ध जुइगु अवस्था जिमित मान्य जुइमखु”, सङ्गतं धयादिल। वडा नं ३२ या वडाध्यक्ष नवराज पराजुलीं, विवाद दूगु छुं नं योजना कार्यान्वयनय् मयंकेगु धयादिल। खँ मिले जुइ, सकसिया सहमति जुइसा जिपिं ज्या न्ह्याकेत तयार दु। जनतां पुलातःगु कर खःगु थासय् छ्यलेमाःगु वय्कलं धयादिल।

सम्पदालिसें पर्यटन विभागया प्रमुख कुमारी राईया कथं समितिं गगनेश्वरया देगःयात स्वतजाःया दयेकेगु निर्णय याःगु दु। थ्व विषय पुरातत्व विभागयात जानकारी याकेगु व साझेदार लिसें सरोकारवाला दथुइ विभागय् थप सहलह यायेगु समितिं याःगु निर्णय खः। देगः आः न्हापांगु चरणय् निर्माण जूगु दु।

थ्वहे संरचनाय् निर्माण न्ह्याके फइगु मफइगु विषयय् सहलह यानाः बैठकं जमिनय् खनेदूगु ब्वःया प्राविधिकतय्सं अध्ययन यानाः प्रतिवेदन बिइगु, जमिनतले खनेमदुगु ब्वःया सन्दर्भय् थ्व ज्या याकीगु ज्याकुथि व ज्या याइगु उपभोक्ता समितिपाखें लिखित प्रतिवेदन कयाः न्ह्याः वनेगु निर्णय जूगु दु। येँमपां हे कोटेश्वर महाद्यः देगः पुनर्निर्माणया मागया सम्बन्धय् सहलह यानाः सामान्य भिंकेगु ज्यायात निरन्तरता बिइगु बाय् पुनर्निर्माण यायेमाःगु आवश्यकता अध्ययन याइगु जूगु दु।

Categorized in राष्ट्रिय