ऐतिहासिक, धार्मिक व पुरातात्विक महत्व दूगु तोखाय् बिस्काः जात्रा प्यन्हु हनीगु जूगु दु। तोखा बिस्काः जात्रा मूल व्यवस्थापन समितिं थौं पत्रकार सम्मेलन यानाः नेवाः समुदाय यक्व दूगु तोखाय् वइगु वैशाख १ गतेनिसें ४ गतेतक बिस्काः जात्रा हनेत्यंगु जानकारी ब्यूगु खः।

पत्रकार सम्मेलनय् समितिया सहसंयोजक गणेशमान श्रेष्ठं जात्रायात व्यवस्थित व मर्यादित जुइकेत शान्तिसुरक्षा, स्वयम्सेवक व्यवस्थापन, पार्किङ व्यवस्थापन, यातायात व्यवस्थापन, बाजागाजा व्यवस्थापन, रथजात्रा व्यवस्थापनया निंतिं थी थी उपसमिति गठन याःगु जानकारी बियादिल।चैत मसान्तंनिसें हे सुरु जुइगु बिस्काः जात्रा मूकथं प्यन्हु हनेगु याइ।

भक्तजन मसान्तया सुथय् शिवपुरीया बागद्वारय् म्वः ल्हू वनी। बागद्वारं उकुन्हु बहनी चण्डेश्वरी जुयाः सपनतीर्थ देगलय् वइगु प्रचलन दु। सपनतीर्थ देगः लागाय् गौमुखी व बहुमुखी खुसि थुनाः निर्माण यानातःगु सिद्धपुखुली भक्तजनतय्सं न्हूगु दँ सुरु जुइबलय् वैशाख १ गते सुथन्हापांनिसें म्वः ल्हुइगु याइ।

मसान्तया दिं सनिलय् सपनविनायकया रथ, चण्डेश्वरीया रथ व मसानकालीया रथ ‘जाली द्यो’कथं बाजागाजालिसें जात्रा यानाः इन्द्रायणी दाफा खलकं मूल नाइके तयाः रथ थःथःगु देगलय् यंकी।न्हूगु दँकुन्हु सनिलया ६ ताः इलय् थःथःगु देगलं गामय् रथ हइगु व गां चाःहिइकाः सपनविनायकया रथ यलागः त्वालय्, चण्डेश्वरीया रथ थलागः त्वालय् व मसानकालीया रथ भूतख्यलय् दीकेगु याइ। वैशाख २ गते सुथय् स्वगू हे रथ गां चाःहिइकाः मसानकालीया रथ भूतख्यःया पाटीइ दिकेधुंकाः बली पुजा कयाः कोठु गणेद्यः व मसानकाली निगुलिं रथ छकलं हयाः ११ ताःइलय् थलागः त्वालय् छसिंलाक्क दिकेयंकी।

उकुन्हु हे न्हिनेसिया ३ ताःइलय् जीवित गणेश कुमारीयात बिज्याकाः तलेजुं सरकारी पुजा हयाः सिन्हःजात्रा यानाः थनी। उकुन्हु हे सनिलय् गां चाःहिइकाः सनिलया ७ ताःइलय् फुक्क रथ तपलाक्षीइ दिकेयंकी। उकुन्हु चान्हय् भक्तजन रथया न्ह्यःने भजनकीर्तन यानाः मद्यंसे च्वनीगु चलन दु।वइगु वैशाख ३ गते सुथय् ७ बजे तपलाक्षीपाखें सिन्दूरजात्रा यानाः द्यःयात ल्ह्वनाः गां चाःहिइके यंकीगु याइ । उकुन्हु सुथय् ११ ताःइलय् हासल त्वालय् फुक्क रथ दिकेयंकी । उकुन्हु न्हिनेसिया ३ ताःइलय् तलेजु गुठीं जीवित गणेद्यः कुमारीलिसें पुजा हयाः सिन्हःजात्रा यानाः सरस्वती व महाद्यःया रथबाहेक मेगु रथ पुखुली शुद्ध यायेत यंकी।

मसानकालीया देगः व गां चाःहिइकाः कोनेलाक्षीइ दिकेयंकी। उकुन्हु चान्हय् नं भक्तजन रथया न्ह्यःने भजनकीर्तन यानाः जाग्राम च्वनीगु चलन दु।जात्राया अन्तिम दिं वैशाख ४ गते सुथय् ६ः३० ताःइलय् सिन्हः जात्रा यानाः दक्व बाजागाजालिसें गां चाःहिइके यंकी व सुथसिया ११ ताःईपाखे गच्छे त्वालय् दिकेयंकी। उकुन्हु न्हिनेसिया ३ ताःइलय् तलेजु गुठीं जीवित गणेश कुमारीलिसें पुजा हयाः सिन्हः जात्रा यानाः फुक्क रथ कापः लानाः गां चाःहिइकाः थःथःपिनिगु द्यः छेँय्छेँय् दुतयंकी। अनंलि जात्रा पूवनी ।

वैशाख ५ गते सुथसिया ६ः३० ताःइलय् यःसिं क्वःथलाः जात्रा क्वचायेकी।उगु झ्वलय् तोखा नगरपालिकाया प्रमुख प्रकाश अधिकारीं तोखादुनेया ऐतिहासिक नखःयात नगरपालिकां उच्च प्राथमिकता ब्यूगु धयादिल। वय्कलं तोखाया जात्रा व्यवस्थापनया निंतिं नगरपालिकां वजेट विनियोजन याःगु न्ह्यथनादिल।तोखां जात्राया झ्वलय् छन्हु तोखा नगरपालिकान्यंकं व निन्हु जात्रा जुइगु वडा २ व ३ य् बिदा बियावयाच्वंगु खः।

Categorized in राष्ट्रिय