धार्मिक, सांस्कृतिक लिसें पुरातात्विक महत्त्व दूगु तोखाय् सपनतीर्थ मेला सुरु जूगु दु।

न्हूगु दँया न्हापांगु दिं जुइगु उगु मेलाय् थौं सुथंनिसें सपनतीर्थ देगलय् दर्शन यायेत वनीपिं भक्तजनत म्वःम्वः जूगु खः। सपनतीर्थ देगलय् दर्शन यानाः अनया पुखुलिइ म्वः ल्हुयाः कुष्ठरोग लनीगु जनविश्वास दु।

सपनतीर्थ देगलय् दर्शन व पुखुलिइ म्वः ल्हुइत स्वनिगःलिसें दय्या थी थी थासं भक्तजन सपनतीर्थ देगलय् थ्यंवःगु खः। सपनतीर्थय् मेलालिसें तोखाय् ऐतिहासिक बिस्काः जात्रा नं सुरु जूगु नेवा गुथिः तोखाया नायः रमेश नापितं जानकारी बियादिल।

सपनतीर्थ मेला थौं छन्हु जक जुइगु जूसां नं तोखाया जात्रा धाःसा ४ गतेतक न्ह्याइ। तोखां जात्राया झ्वलय् कन्हय् वैशाख २ गते बुधबाः तोखान्यंक व वैशाख ३ व ४ गते तोखा नगरपालिका–२ व ३ य् बिदा ब्यूगु खः।

Categorized in राष्ट्रिय