ख्वपया लोकंह्वाःगु बिस्काः जात्राया न्यान्हुया दिं म्हिगः सनिलय् भेलुख्यःया यःसिं ख्यलय् ५५ ल्हाः तःहाकःगु यःसिं क्वःथलेगु जात्रा क्वचाःगु दु।

पुलांगु दँयात बिदा यानाः न्हूगु दँयात लसकुस यायेगु कथं छन्हु न्ह्यः थंगु यःसिं म्हिगः तान्त्रिक विधि कथं पुजा यानाः सनिलया ५ः४९ या साइतय् क्वःथःगु खः।

भैलःद्यःया चिं कथं कयातःगु यःसिंकय् अष्टमातृयाका चिं कथं च्यापू खिपः चायेकाः फुक्कपाखें सात्तुसालाः यःसिं क्वःथयेगु याइ। यःसिं क्वःथलेगु यात नं बिस्काःया मू जात्रा कथं कायेगु यानातःगु दु। थ्व जात्रा लिपा तलेजु दुने दुमाजुया विशेष पुजा यानाः यःसिं ख्यलय् च्वंगु भैलः व भद्रकालीया खःयात गाःहिटि थ्यंकाः खः ल्वाकेगु याइ।

थ्व जात्रा स्वयेदसा सुख, समृद्धि, सहकाल वयेगु नापनापं शत्रुत नाश जुइ धइगु धार्मिक मान्यता दयाच्वंगुलिं थुकियात शत्रुहन्ता जात्रा नापं धायेगु याः।

Categorized in राष्ट्रिय