राष्ट्रियसभा नायः नारायणप्रसाद दाहाल व टर्कीया संसद ग्रान्ड नेसनल एसेम्बलीया सभामुख नुमान कुर्तुल्मुस नापलानादीगु दु।अन्तर व्यवस्थापिका सङ्घ (आइपीयू)या १५२ क्वःगु महासभाय् ब्वति कायेत इस्तानबुलय् झायाच्वनादीम्ह नायः दाहालं शनिबाः टर्कीया संसदया सभामुखयात नापलानादीगु खः।

नापलायेगु झ्वलय् निगू देय् दथुया स्वापू, थःथवंय् हित व संसदीय सहकार्यया विषयय् सहलह जूगु नायः दाहालया सचिवालयं धाःगु दु। वहे झ्वलय् नायः दाहालं संसदीय सहकार्यया माध्यमं निगू देय् दथुया स्वापू अझं क्वातुकेमाःगु धयादिसें संसदीय अनुभव कालबिल, भ्रमण व संसदीयमैत्री समूह नीस्वनेगु निंतिं थःपिं तयार दूगु धयादिल।निगू देय् दथुया कूटनीतिक स्वापू खुगू दशकनिसें तसकं सौहार्द व थःथवंय् हनाबनाय् लिधना च्वंगु धयादिसें नायः दाहालं आः वइगु दिनय् निगूपक्षीय स्वापूयात अझं तब्याकेत नेपालय् हे टर्कीया दूतावास नीस्वनेत इनाप यानादिल।

आः टर्कीलिसे स्वानाच्वंगु फुक्क ज्याया निंतिं नेपाःमिपिं भारतया राजधानी दिल्ली वनेमाःगु जुयाच्वंगु धयादिसें नायः दाहालं नेपाः व टर्की दथुया श्रम सम्झौता यायेगु नापनापं नेपालय् हे टर्किस दूतावास नीस्वनेफुसा निगू देय् दथुया मंकाः ज्या अझं अःपुइगु विश्वास प्वंकादिल। आइपीयूया महासभाय् टर्की सरकार व संसद्ं याःगु लसकुस व हार्दिकताया निंतिं नायः दाहालं सुभाय् देछानादिल।

उगु ज्याझ्वलय् टर्कीया संसद् ग्रान्ड नेसनल एसेम्बलीया सभामुखं राष्ट्रियसभा नायःलिसें नेपाली संसदीय प्रतिनिधिमण्डलयात इस्तानबुलय् लसकुस यायेदयाः थः तसकं लय्तानागु धयादिल। टर्की व नेपाः दथुया निगूपक्षीय स्वापू अझ धिसिलाकेत थःपिं न्ह्याबलें तयार दूगु धयादिसें सभामुख नुमानं नेपालय् टर्किस दूतावास चायेकेगु खँय् थःपिं सकारात्मक दूगु धयादिल। टर्किया सरकारं नेपाःया निंतिं सीमित कोटाया शैक्षिक छात्रवृत्तिया व्यवस्था यानागु न्ह्यथनादिसें वय्कलं छात्रवृत्तिया कोटा अप्वयेकेगु व निगू देय् दथुया बनेज्या नापं तब्याकेगु प्रतिबद्धता प्वंकादिल।

आः वइगु नोभेम्बरय् कोप–३१ टर्कीइ जुइत्यंगु न्ह्यथनादिसें सभामुख नुमानं उकिया नेतृत्वया निंतिं टर्कीयात माःगु ग्वाहालि यायेत इनाप नापं यानादिल। नापलायेगु झ्वलय् आइपीयूय् ब्वति काःवंपिं नेपाली संसदीय प्रतिनिधिमण्डलया दुजःपिनिगु नापं उपस्थिति दूगु खः।

Categorized in राष्ट्रिय