यल महानगरपालिका–१६ वडा कलाकार समितिं वरिष्ठ कलाकार ख्याल जुजु मदनकृष्ण श्रेष्ठयात नागरिक अभिनन्दन याइगु जूगु दु।

वरिष्ठ कलाकार श्रेष्ठयात यल लाय्कूलीइ परम्परागत शैलीइ बाजं थानाः लसकुस यायेगु १६ वडाया अध्यक्ष निर्मलरत्न शाक्यं धयादिल। “नेवाः परम्परा कथं बुदिंया सगं लःल्हायेगु जुइ, कलाकार समितिं ‘ललितरत्न’ उपाधिलिसें हनापौ लःल्हाइगु ज्याझ्वः क्वःछिनातःगु दु, थ्व ज्याझ्वलय् ललितपुर तयारी पोशाक व्यापार सङ्घ, वाद्य शिरोमणि घराना, आरबी डायमन्ड ज्वेलरी, पाटन पर्यटन विकास संस्था, ज्योति म्युजिक, यल नेवाः समाज, मुनासः, शाक्य बज्राचार्य समाज, ताम्रकार समाज, ललितपुर हस्तकला सङ्घ, प्लेइग फर चैन्ज, डिलाइट स्कुल, नेपाल भाषा मंका खलः यल, मङ्गल टोल सुधार सङ्घ, थ्रीस्टार क्लब, ललितपुर उद्योग वाणिज्य सङ्घ, ललितपुर सुनचॉदी व्यवसायी सङ्घ, स्यस्यः समाज, प्रोजेक्ट बाजा नेपाल, भुल्खु टोल सुधार समिति लिसें नीगूलिं मल्याक सङ्घसंस्थां हनापौ लःल्हाइगु ज्याझ्वः तयातःगु दु”, वय्कलं धयादिल।

ज्याझ्वलय् श्रेष्ठया अभिन्न ब्यक्तित्वपि नाप संवाद याकेगु नापनापं वरिष्ठ कलाकार श्रेष्ठया लोकंह्वाःगु म्येत न्ह्यब्वयेगु धकाः वडा नं. १६ कलाकार समितिया कजि लिसें ज्याझ्वःया कजि सुरजवीर बज्राचार्यं जानकारी बियादिल। सनिलया ५ ताः इलय् यल लाय्कूली लसकुस यानाः कात्तिक डबलीइ जुइगु हना ज्याझ्वलय् लोकंह्वाःपिं म्ये हालामिपिंसं मदनकृष्ण श्रेष्ठया म्ये न्ह्यब्वइगु ज्याझ्वः नापं दूगु बज्राचार्यं जानकारी बियादिल।न्यादँ न्ह्यवंनिसें मदिक्क कला ख्यलय् समर्पित जुयाः थीथी ज्याझ्वः यानाः वयाच्वंगु १६ वडा कलाकार समितिं थ्व सिबे न्ह्यः वरिष्ठ शास्त्रीय सङ्गीतज्ञ मोहनप्रसाद जोशी लिसें वरिष्ठ कलाकार रत्न बेहोसीयात ललितरत्न उपाधि लःल्हानाः हनेधुंकूगु दु।

कजि बज्राचार्यया कथं हनेगु लिसें नागरिक अभिनन्दन नापनापं सांस्कृतिक साङ्गीतिक ज्याझ्वः सनिलय् जुइगु दुसा सुथसिया ९ः०० ताः ईनिसें वरिष्ठ कलाकार श्रेष्ठ याःगु बुदिंया लसताय् यल लाय्कू, महारानी पुखू लागाय् हिदान ज्याझ्वः नापं जुइगु जूगु दु।

Categorized in राष्ट्रिय