येँया विष्णुमति खुसि सिथय् प्यंगू पेस्तोल व ५८ राउण्ड गोली लुयावःगु दु।येँ महानगरपालिका १५ शोभा भगवतीइ च्वंगु विष्णुमति खुसि सिथंउगु पेस्तोल व गोली बरामद याःगु जिल्ला प्रहरी परिसर येँया एसएसपी रमेश थापां जानकारी ब्यूगु दु।

एसएसपी थापाया कथं पेस्तोल व गोलीया लिसें ७ थान म्यागजिन नं लुयावःगु दु।बरामद पेस्तोल टाइप ५४ या खः। वहे पेस्तोलया म्यागजिन ७ थान लुयावःगु खः।महानगरपालिका व प्रहरीया सुचुपिचु पुचलं सुचुपिचु यायेगु झ्वलय् आइतवाः सुथय् उगु पेस्तोल व गोली लुइकूगु खः।

९ एमएम बेरेटा पेस्तोलया गोली ५८ राउण्ड बरामद जूगु खः।विशेष सुचंया आधारय् प्रहरी वृत्त स्वयम्भूपाखें खटेजूगु पुचलं उगु ल्वाभः बरामद याःगु खः। उगु ल्वाभः जेनजी आन्दोलनया झ्वलय् प्रहरीपाखें हे लुटेयाःगु जुइफूगु आशंका याःगु दु।

Categorized in अपराध