देय्न्यंकंया नेवाःतय्गु मंकाः राष्ट्रिय संगठन नेवाः देय् दबू व देयन्यंकंया नेवाः पत्रकार पिनिगु संगठन नेवाः पत्रकार राष्ट्रिय दबू नापनापं जानाः वनेगु खँय् निगू हे दबूया नेतृत्वया दथुइ सहलह जूगु दु।

पत्रकार दबूया ग्वसालय् आइतवाः जूगु सहलह ज्याझ्वलय् देय् दबू व पत्रकार दबूया नेतृत्वपाखें नेवाः मुद्दायात कयाः नापनापं जानाः थःथःगु थासं भूमिका म्हितेगु लिसें संगठन निर्माणया ज्याय् तकं जानाः वनेमाःगु खँय् सहलह ब्याकूगु खः।

येँय् जूगु ज्याझ्वलय् नेवाः देय् दबूया न्हू निर्वाचित जुयादीम्ह नायः रश्मीला प्रजापतिं आःया अवस्थाय् पत्रकार दबू व देय् दबू नापनापं जानाः नेवाःतय्गु निंतिं ज्या यायेमाःगु खँय् बः बियादिल। देय् दबू धइगु अधिकारमुखि संस्था जूगुलिं देय् दबूपाखें जुइगु ज्या नेवाः पत्रकारपिसं माःगु कथं प्रचार प्रसारया निंतिं ज्या यायेमाःगु खँय् बः बियादिल।

देय् दबूया बरिष्ठ न्वकू सत्यनारायण डंगोलं देय् दबू व पत्रकार दबूया पासापिनिगु दथुइ न्हापाया स्वापू बांलाःगु खँ न्ह्यथनादिसें आः झन क्वातुका नापं जानाः वनेमाःगु खँय् बः बियादिल। देय् दबुया न्वकू उमेश स्थापितं दबूया विधान कथं पत्रकार दबूयात दुथ्याकाः यंकेफइगु प्रावधानत दुगु खँ धयादिसें विषयगत समिति कथं वनेगु धइगु भातृ संगठन कथं वनेगु खँ मखु धयादिल। देय् दबूया मूछ्याञ्जे श्रीकृष्ण महर्जनं देय् दबू व पत्रकार दबूयात नेवाः देय् दबू नाप स्वाकायंकेगु निंतिं विधानकथं विषयगत समिति व संस्थागत दुजःया प्रावधान दु धयादिसें निरन्तर रुपं थुगु कथं सहलह ब्याकाः वनेमाःगु खँय् बः बियादिल।

नेवाः पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठं पत्रकारपिं सुयागु नं भातृ संगठन जुइमज्यूगु खँय् बः बियादिल । पत्रकार दबूया निर्वतमान नायः सुरजवीर वज्राचार्यं पत्रकार दबू व देय् दबू निगुलिं नेवाः समुदायया निंतिं ज्या याइगु संस्था खः धयादिल। पत्रकार दबूया बरिष्ठ न्वकू सुनिल महर्जनं नेवाः पत्रकार धाये धुनेवं नेवाः भासं च्वइपिं जक मखु न्ह्याग्गुं भाषं च्वइपिं जूसां नेवाःत हे नेवाः पत्रकार खः धयादिसें नेवाः पत्रकारपिनिगु सवालय् नं देय् दबूपाखें ध्यान बीमाः धयादिल।

अथे हे पत्रकार दबूया मूछ्याञ्जे केके मानन्धरं नेवाः पत्रकार राष्ट्रिय दबूया स्थापना कालंनिसेंया देय् दबूनाप स्वापू दुगु खँ न्ह्यथँसें थ्व निगू हे नापनापं वनेगुया विकल्प मदु धयादिल ।देय् दबूया न्हू निर्वाचित केन्द्रीय नेतृत्व पदाधिकारी नापं दुजःपिंत देय्न्यंकंया नेवाः पत्रकारपिनिगु मंकाः संगठन नेवाः पत्रकार राष्ट्रिय दबूपाखें भिंतुना देछासें लसकुस नापं सहलह ज्याझ्वः जूगु खः।

आइतवाः जूगु ज्याझ्वः पत्रकार दबूया नायः नृपेन्द्रलाल श्रेष्ठया सभाध्यक्षताय् जुगु उगु ज्याझ्वलय् देय् दबूया केन्द्रीय नेतृत्वपिं ल्यूछ्याञ्जे बासु श्रेष्ठ, छ्याञ्जेपिं मचाराजा महर्जन, सिजन श्रेष्ठ, दांभरी माइला डंगोल, दुजःपिं नरेश श्रेष्ठ, शोभा वज्राचार्य महर्जन, सुदन मुनिकार, रमना श्रेष्ठ, ललिता प्रधान लगायपिं ब्वति कयादीगु खः।पत्रकार दबूया ल्युछ्याञ्जे सुनिता महर्जनं न्ह्याकादीगु खः।

Categorized in राष्ट्रिय