सुरेश किरण आधुनिक युगया धर्मादित्य
लहनान्युज | बछलाथ्व त्रयोदशी ११४६, बैसाख १६ बुधवाः
भाषा आयोगया दुजः, नेवाः पत्रकार राष्ट्रिय दबूया सल्लाहाकार लिसे ‘नेपालभाषा टाइम्स’या पुलांम्ह सम्पादक सुरेश किरण मानन्धरया स्मृति ग्रन्थ वय्कःया लत्याः कुन्हु छगू ज्याझ्वः यानाः पिथनेगु ज्या जूगु दु। नेवाः पत्रकार राष्ट्रिय दबूया ग्वसालय् व येँ महानगरपालिका व नेपाल प्रज्ञा प्रतिष्ठानया सहकार्यय् उगु स्मृतिग्रन्थ पिथंगु खः।
स्मृति ग्रन्थ मंकाः कथं भिक्षु कौडिण्य, नेपालभाषा एकेदेमीया भ्वाइस चान्सलर डा. पुष्पराज राजकर्णिकार, नेवाः देय् दबूया अध्यक्ष रश्मिला प्रजापति, नेपाल आदिवासी जनजाति पत्रकार महासंघ (फोनिज) या अध्यक्ष लक्की चौधरी, प्रेस काउन्सिल नेपालया प्रमुख अधिकृत झविन्द्र भुसाल, दबूया अध्यक्ष नृपेन्द्रलाल श्रेष्ठ, पुलांपिं अध्यक्ष श्रीकृष्ण महर्जन व सुरजवीर वज्राचार्यपिसं मंकाः कथं पितब्वज्या यानादीगु खः।
ज्याझ्वलय् लसकुस यायेगु झ्वलय् दबूया न्वकू सुरेन्द्रभक्त श्रेष्ठं सुरेश किरणया कारणं आपालं नेवाः पत्रकारत उत्पादन जूगु खँ न्ह्यथनादिसें नेपालभाषा पत्रिका पिथनाः छु दइ धइगु न्ह्यसः थनेगु यानाच्वंगु खःसा थौंया अवस्था नेपालभाषा पत्रकारिता यानाः हे थम्हं छेँ चले यानाच्वनागु खँ धयादिल।
उकथं हे वय्कलं मदुम्ह सुरेश किरण छम्ह कल्पवृक्ष खः धयादिसें सुनां नं छुं खँ न्यन धाःसा उकियात ध्वाथुइक लिसः बीगु ज्याय् न्ह्याबलें न्ह्यःने लाम्ह व्यक्ति खः धयादिल । वय्कलं मदुम्ह सुरेश किरण लिसे खँल्हाबल्हाया झ्वलय् नेपालभाषाया छगू ब्रोडसिट पत्रिका पिकायेगु खँ जूगु खःसां नं उगु ज्या पूवंके मफुगुलिइ दुःख नं प्वंकादिल ।
उकथं हे दबूया वरिष्ठ उपाध्यक्ष सुनिल महर्जनं सुरेश किरण नेपालभाषाया मेम्ह धर्मादित्य धर्माचार्य जूगु खँ धयादिल । नेपालभाषा निंतिं निरन्तर तःदँ तक पत्रकारिता यायेगु धइगु चीधंगु खँ मखु धासें वय्कलं मदुम्ह सुरेश किरणं गुगु त्याग यानादिल उकियात सदां लुमंकातयेमाःगु खँ धयादिल।
उकथं हे ज्याझ्वलय् न्ववायेगु झ्वलय् एकेदेमीया भ्वाइस चान्सलर राजकर्णिकारं मदुम्ह मानन्धरं पत्रिकापाखे समाज हिलेत तःधंगु योगदान याःगु खँ धयादिल । वय्कलं समाजय् विद्यमान कुरीति, बेथिति व विसंगति विरुद्ध मानन्धरया च्वसा न्ह्याकादीगु खँ लुमंकूसें समाज रुपान्तरणय् वय्कःया भूमिका दुगु खँ धयादिल।
ज्याझ्वलय् न्ववायेगु झ्वलय् फोनिजया अध्यक्ष लक्की चौधरी मानन्धरया रचना व सिर्जनाय् सामाजिक रुपान्तरण चेत खनेदुगु धासें मदुम्ह मानन्धरया रचना व र्सिजनां च्वसांपाखे समाज रुपान्तरण अभियानय् योगदान दुगु खँ धयादिल। लिसे चौधरीं मदुम्ह मानन्धरया सिर्जना व कृतिं अमर दयेकूगु धासें वय्कः मदयाः देय् व समाजयात तःधंगु क्षति जूगु खँ धयादिल।
उकथं हे ज्याझ्वलय् न्ववायेगु झ्वलय् भिक्षु कोडण्यं मदुम्ह सुरेश किरणं बुद्ध धर्मया प्रचार यायेगु ज्याय् योगदान याःगु खँ लुमंकादिल । वय्कलं सुरेश किरणं बौद्ध धर्मया प्रचार प्रसार जुइमाः धकाः हे पत्रिकाय् वालय् छन्हु बुद्ध धर्मया च्वसु तयेगु याःगु कारणं आपालं बुद्ध धर्म सम्बन्धी च्वइपिं पत्रकारत जन्मे जूगु खँ न्ह्यथँसें धयादिल, ‘सुरेश किरण भाषा, साहित्य, इतिहास, संस्कृतिइ जक लिमकुसें बुद्ध धर्मयात नं प्रचार प्रसार यायेगुलिं योगदान यानादीगु दु । वय्कःया कुतलं हे सम्यन चिन्तन धकाः बुद्ध धर्मया च्वसु पिहां वयेगु ज्या न्ह्याःगु खः।’
नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठया अध्यक्षताय् न्ह्याःगु ज्याझ्वलय् नेवाः देय् दबूया अध्यक्ष रश्मिला प्रजापति, सहकर्मी उदेन न्हू साय्मि, पुलांम्ह मन्त्री राजेन्द्रप्रसाद श्रेष्ठ, पिसं मदुम्ह सुरेश किरणयात कथाः थःगु धापू तयादीगु खः। साहित्यकार प्रतिशरा साय्मिं मदुम्ह सुरेश किरणया बारे कविता न्यंकादीगु खः। उकथं हे ज्याझ्वलय् कवियित्री रजनी मिलां मदुम्ह मानन्धरया कविता ब्वनाः न्यकादीगु खः। स्मृति ग्रन्थय थीथी ९१ म्ह च्वमिया च्वसु दुथ्याःगु दु।
