राष्ट्रिय चेस  रामहरिकृष्ण स्मृति स्वक्वःगु राष्ट्रिय रापिड नाप निक्वःगु राष्ट्रिय ब्लिट्ज चेस प्रतिस्पर्धाया निगुलि विधाय् उत्कृष्ट कासा न्ह्यब्बसे  एफएम क्षितिज भण्डारी व कृतिसरा अधिकारीं त्याकूगु दु।

राष्ट्रिय कासा रापिड कासाय् २१३६ रेटेट कासामि क्षितिज भण्डारीं ९ चरण स्पर्धाय् ८.५ ल्याः हया उपाधि त्याकगु खः। भण्डारीं व्यक्तिगत ३१.४ रेटिङ अप्पाका २३६० या रेटिङ पर्फमेन्स यायेत ताःलागु खः।अथेहे ब्लिट्ज विधाय् मकवानपुरया क्षितिज भण्डारीं ९ ल्याः हया राष्ट्रिय विजेता जूगु खः। शीर्ष २२३३ रेटेड कासामि भण्डारीं व्यक्तिगत २६ रेटिङ अप्पाका २६५१ रेटिङया सर्वोत्कृष्ट कासा पर्फम हःगु खः।

मिसा राष्ट्रिय रापिड पाखे १७५९ रेटेड कृतिसरा अधिकारीं याकचां ६ ल्याः हया राष्ट्रिय विजेता जूगु खः। झापा जिल्लाया कृतिसरां व्यक्तिगत २१.८ रेटिङ अप्पाका १९१० रेटिङ बराबरया कासा पर्फम याःगु खः। अथेहे १६६७ रेटेड कृतिसरां ब्लिट्ज विधा पाखे ६.५ ल्या हया व्यक्तिगत ४० रेटिङ सुधार याःगु खः।

अथेहे राष्ट्रिय विजेता भण्डारीं नगद ५० हजार सिरपा काःगु खःसा मिसा विजेता अधिकारीं नगद रु. १५ हजार सिरपा, ट्रफि, मेडल नाप प्रमाणपत्र काःगु खः। राष्ट्रिय चेस कासाय् थीथी जिल्लापाखे १८० म्ह कासामिपि मध्ये ५३ म्हेसिया थीथी विधाय् कूल नगद ३ लाख सिरपा काःगु खः।रापिड कासाय् २ लाख नाप ब्लिट्ज पाखे नगद १ लाख सिरपा त्याकूगु खः।

क्षेत्रपाटी क्लबया ग्वसालय् जुगु उगु ज्याझ्वःया मूपाहा येँ महानगरपालिकाया कार्यवाहक मेयर सुनिता डंगोलं त्याःपि कासामि तय्त सिरपा लःल्हागु खः।

क्लबया अध्यक्ष गोपाल मालीया सभाध्यक्षताय् जुगु उगु ज्याझ्वलय् हास्य कलाकार हरिवंश आचार्य, येँ महानगरपालिका वडा नं. १७ वडाअध्यक्ष नवीन मानन्धर, बुद्धिचाल महासंघया प्रवक्ता राजु ताम्राकारपिन्स भिंतुना न्वचु तयादीगु खः।

Categorized in कासा