देयन्यकं नेवाः तयेगु राष्ट्रिय संगठन नेवाः देय् दबू न छगू विज्ञप्ति प्रकाशितयासे सरकार सुकुम्बासी तय्त ल्ह्वःगु पलाःयात आपत्ति प्वकूसे मानवअधिकारया उल्लंघन व सुकुम्बासीयात अन्यायपूर्ण व्यवहार जूगु दु धका धाःगु दु।

देय् दबूया अध्यक्ष रश्मिला प्रजापतिं ल्हाःचिं तया छगु विज्ञप्तिमा पिथःगुलि धयातःगु दु ‘खुसिँ सिथय् च्वना च्वपिनिगु निति जोखिमपूर्ण जूसा, बिना आवास विस्थापन यायेगु राज्यया विधि प्रक्रियाय् कमजोरी खः।’ विगतय् आदिवासी नेवाः समुदाय व मेमेपि रैथाने जनतायात राज्यं दमन, पुनर्वासया बहानाय् जबरजस्ती स्थानान्तरण व विकासया नामय् विस्थापन याःगु खँ ल्ह्वसे विज्ञप्तिइ धाःगु दु‘ थुगु पटक न सतक विस्तार, खोला मापदण्ड, सार्वजनिक व गुठी जग्गा व्यवस्थापनया नामय् विस्थापनया प्रक्रियाय् देययकं जुयाच्वंगु दु।

थ्व संविधान प्रदत्त मौलिक हक अःखः खः।’ नेपाःया संविधान, २०७२ या धारा ३७ (आवासया हक), धारा २५ (सम्पत्तिया हक) व धारा ४२ (सामाजिक न्याय) न आदिवासी व रैथाने समुदायया परम्परागत भुमि अधिकार स्पष्ट रुपं प्रत्याभूत याःगु दु। तर लालपुर्जा मदुपिन्त स्वबासी तयेत विस्थापन यायेगु गुठी नाप सांस्कृतिक जग्गापाखे बेदखल यायेगु व बिना पूर्वसूचना नाप परामर्शं डोजर छ्यलिइगु धइगु संविधानया उल्लंघन जुगु धका विज्ञप्तिइ धयातःगु दु।

देयु दबू न थुकिया विरुद्ध छप्प जुइत इनापयासे अन्तर्राष्ट्रिय मानवअधिकार संस्था तय्त नेपालय् जुयाच्वंगु अन्यायया जानकारी यायेत इनाप याःगु दु।

Categorized in राष्ट्रिय