साहित्यकार कवयित्री प्रतिसरा सायमिया “सर्जक व सिर्जना” ज्याझ्वः जूगुु दु। नेपालभाषा एकेदेमिया ग्वसालय् जूगु उगु ज्याझ्लय् एकेदेमिया सदस्य सचिव महेन्द्रगोपाल कर्माचार्यं ज्याझ्वः न्हयाकादीगु खः।

एकेदेमिया चान्सलर मल्ल के. सुन्दरया सभाध्यक्षताय् जूगुलि मूव्यक्तित्व प्रतिसरा सायमियात स्वांमाः क्वखायेका दबुलिइ लसकुस यानादीगु खः।एकेदेमिया सचिव राजितबहादुर श्रेष्ठं लसकुस यानादिगुलि सायमिया म्हसीका ज्याझ्वः कजि प्रा. प्रेमशान्ति तुलाधरं यानादिगु खःसा कवयित्री लक्ष्मी मालीं कविया मिखाय् प्रतिसरा न्ह्यब्वयादिगु खः।

संगीतकःमि प्राज्ञ रिता महर्जनं सर्जकनापं छझाः न्यनेकने यानादिलसा ज्याझ्वलय् कवि श्रीराम श्रेष्ठ, कवयित्री रजनी मिला, रेहना नकर्मी मानन्धर, कवि बसन्त नकर्मी, कवयित्री विनिता बज्राचार्य, कवि रामगोपाल आशुतोष व कवि हिसिलिना शाक्यपिन्सं कवयित्री प्रतिसरा सायमिया कविता ब्वनाः न्यंकादिगु खः।अथेहे गोविन्द ह्यूमत, जुजुकाजी रंजित, रिता महर्जन व रत्नशोभा महर्जनपिन्सं म्ये हाला न्यंकादिगु खः।

Categorized in राष्ट्रिय