नेपाःया संचार ख्यलय् नेपालभाषाया पत्रिका पिकायेगु धै गु उलि अःपुगु विषय पक्कां मखु। उकिसन थौंया ई धैगु अनलाइनया ई । समाजिक सञ्जालया तःधंगु प्रभाव लानाच्वंगु ई।

थ्व इलय् नेपालभाषा सःपिसं ब्वनीगु नेपालभाषाया पत्रिका पिथनेगु व थाय् थासय् थ्यंकेगु धैगु अःपुगु विषय मखु। थज्वःगु इलय् नं मदिक्क पिथना च्वंगु छगू नेपालभाषाया वाःपौ धैगु लहना वाःपौ खः। नेपाःया संचार ख्यलय् ब्यागलं कथंया म्हसिका बिइत सफल जूगु नेपालभाषाया वाःपौ लहना वाःपौ। लहना वाःपौ धैगु नेपालभाषाया वाःपौ मध्ये रंगीन वाःपौ खः। नेवाःतय्गु हरेक गतिविधियात बुखँया माध्यमं नेवाःतय्गु दथुइ थ्यंकेगु ज्या यानाच्वंगु दु।

नेवाःतय्गु विशेष दिं जुइवं लहना वाःपौपाखें विशेष ल्याःया रुपय् पिथनेगु यानाच्वंगु धैगु मेगु छगू विशेषता खः। नेवाःतय्गु भावना कथंया विशेष ल्याःकथं लहना वाःपौ पिथनाच्वंगु दु। लहना वाःपौया मेगु विशेषता धैगु नेवाःतय्गु थीथी कथंया गतिविधियात रंगित किपाःत पिथना अझ विशेष प्राथमिकता बियाच्वंगु दु। उकिं यानाः नेवाःतय्गु गतिविधियात अझ अप्वः संचार यायेगु ज्या नं यानाच्वंगु खनेदु। लहना वाःपौ नेवाःतय्गु दथुइ जक मखु सरकारी ज्याकूनिसें थीथी महत्वपूर्णगु थासय् नं थ्यंकेगु यानाच्वंगु दु। नेपालभाषां पिदनाच्वंगु लहना वाःपौ थीथी थासय् थ्यनाच्वंगुलिं नेपालभाषाया नं रंगीन वाःपौ पिदनाच्वंगु दु धकाः सन्देश बियाच्वंगु दु।

थ्व छगू कथं नेवाःतय्गु गर्व यायेगु विषय नं जुयाच्वंगु दु। नेवाःतय्गु मुद्दायात मदिक्क ल्ह्वना वयाच्वंगु अले नेपाःया आदिवासी जनजातिय्गु सवालय् नं बुखँ व च्वसुया माध्यमं नेवाःतय्त थुइकेगु याना वयाच्वंगु दु। नेवाःत धैपिं ऐतिहासिक नेपाःगाःया आदिवासीत खः अले आदिवासीया अधिकार धैगु नेवाःतय्गु अधिकार खः। आदिवासीया अधिकार अर्थात नेवाःतय्गु अधिकारया नितिं नेवाःत आदिवासीत जानाः वनेमाः धैगु सन्देश बिइगु ज्या यानावयाच्वंगु ल्याखं स्वलधाःसा थ्व छगू मिसन पत्रकारिता याना वयाच्वंगु वाःपौ खः ।

थुगु वापतिइ पिदनीगु विज्ञापन व नेवाःख्यलय् जक मखु नेवाः मखुपिनिगु थासय् नं थ्यनाच्वंगुलिं व्यावसायीकता पाखे न्ह्याः वनाच्वंगु वाःपौया रुपय् नं नाला कायेफैगु अवस्था दु। थुगु वाःपौ नापनापं लहना मिडिया धकाः संचालन यानाः लहना अनलाईन संचालन यानाच्वंगु नापं लहना मिडियापाखें थीथी सफू तकं पिथनाच्वंगु दु। थुगु कथं लहना वाःपौयात छगू वाःपौया रुपय् जक मखु नेवाःत नापं आदिवासीतय्गु निंतिं मिसन पत्रकारिता यानाच्वंगु नापनापं व्यवसायीक रुपं न्ह्याःवनेगु निंतिं कुतः यानाच्वंगु संचार संस्थाया रुपय् धिसिलाक्क पलाः छिनाच्वंगु दु धकाः धायेफइगु अवस्था दु।

नेपाःया पत्रकारिता ख्यलय् जक मखु आदिवासी जनजातिया पत्रकारिता ख्यः नापनापं समग्र नेपाःया पत्रकारिता ख्यलय् नं थःगु म्हसिका पिब्वया वनाच्वंगु वाःपौ लहना वाःपौ या पुचःयात भिंतुना देछासें अझ अप्वः प्रगति यानावने फयेमा, नेवाः नापं आदिवासी जनजाति व देय्या निंतिं बांलाःगु ज्या यानाः समाजय् सकारात्मक हिउपाःया निंतिं ज्वःमदुगु भूमिका म्हिते फयेमा धकाः भिंतुना देछायाच्वना ।