लहनाया गुण पलाः पत्तिकं भाला । भाला पत्तिकं छगू निश्चित ई । ई पत्तिकं न्हूगु भालाया दुतिना । थुकथं न्ह्यानाच्वंगु पलाखय् पत्रकारिताया लँपु जीवनया अतिकं महत्व बियागु लँपु। श्रब्यदृष्य, च्वज्या व प्रविधिया जःखः चाःहिलाच्वंगु इलं थीथी विषय च्वसु च्वयेत नं छिंकेगु ज्या यानाच्वनी । थुकथं आखःया उकुसमुकुस अध्ययन, अनुभव, बिचाःया च्वसु जुयाः वाइ । उकी छगू लसता लुयाच्वनी । रेडियो संचारया प्राथमिकताया दथुइ च्वसु च्वयेगु ज्या जुयाच्वंगु दु धइथें ।

रेडियो ज्याझ्वः दयेकेगु झ्वलय् आपालं विषय अध्ययन जुयाच्वनी, अनुसन्धान जुयाच्वनी, सःया माध्यमं उगु विषय रेडियोया तरंगं संचार जुयाच्वनीबलय् च्वज्या ल्यूने लाइला धइथें ताइगु तर च्वज्यायात नं नापनापं यंकेगु लकसं सः व आखःया थुगु यात्रा निरन्तर न्ह्यानाच्वनी । थुगु यात्राया तिबः खः लहना मिडिया । सःया संसारय् तनीगु भय दुगु च्वसायात निरन्तर न्ह्याकेगु लकस ब्यूगु गुण दु लहनायाके। उगु गुणया निंतिं सुभाय् देछाय् ।

लहनायाके बिस्कं पहलं सकसिया सः ब्वयेगु गुण नं दु। उकिं लहना पाः । छगू हे तातुना व उत्थें उत्थें च्वंगु पहलं न्ह्यज्यापिनिगु दथुइ बिस्कं पहःया ज्या कि न्ह्यज्यायेत थाकुइगु परिस्थिति ब्वलनी कि न्ह्यज्यायेत हःपा जुइकथं उत्साहं समाजं लसकुस याइ। नेपालभाषाया माध्यमं न्ह्यानाच्वंगु सञ्चार माध्यम दथुइ १४ दँ क्यंगु हाथ्यां जाःगु लकसय् उत्साहं न्ह्यानाच्वंगु लहनाया थुगु यात्रां हे नं यक्वःसित लँपु क्यंगु दु। उगु गुणया निंतिं नं सुभाय् देछाय्। नेपालभाषाया माध्यमं संचार माध्यम न्ह्याकेगु निंतिं दकलय् तःधंगु शक्ति धइगु हे मन व मांभाय् प्रतिया मान खः ।

थ्व हे मानया हुनिं मांभाय्या पत्रकारिता यायेबलय् आर्थिक रुपं लव व आर्थिक रुपं सर्गः थीगु म्हगस म्हंकीपिं दइमखु। मेगु ज्यां ध्यबा मुंकाः मांभाय्या सेवाभावं प्रशारण व प्रकाशनया कर्म यानाच्वंपिं आपालं पत्रकार व पिकाकःपिं दु। वय्कःपिंके थुगु भावना मलुइगु खःसा धर्मादित्य धर्माचार्यं १०१ दँ न्ह्यः नेपालभाषा पत्रकारिताया माध्यमं न्ह्याकादीगु मातृभाषा पत्रकारिताया कठोर लँपु जुयाः थुलि तापाक तक मथ्यनीगु खइ । उकी ब्यवसायिकताया गुण नं लूसा कठोर थुगु लँपु नं लसतां जाइ जुइ । छगू ऊर्जा जाःगु ईतक सासलं सासः मजुइक न्ह्याःगु पलाः निराशां लिफः मस्वइ कथं दीगु अवस्था मलुइगु खः ।

निराशा चीका आशां जाःगु लकस ब्वलंकूगु लहनाया मेगु गुण खः । समाजय् छताः जक खँ मखु, छथाय् जक खँ जुयाच्वनीगु नं मखु। छगू हे क्षेत्र, छगू हे बिधाः, छगू हे भाय्, छगू हे समुदाय, छगू हे धर्म, छगू हे ज्याझ्वः, छगू हे सरकार, छगू हे संगठन, छगू हे बिचाः नं मखु। अनेक रंगं झलमल्ल धयाच्वंगु झीगु समाजाय किपाः जुइत नं थाकु संचार माध्यमयात । सकसिगु संचार माध्यम जुलकि तिनि सकसिनं थःगु संचार माध्यम नाली, तिबः बी । सकसिगु जुइ मफयेखतं दाग की । दाग कीवं लँपुइ ध्याचः दनीयः । पलाः छी थाकुइयः । व ल्याखं निश्पक्ष जुयाः न्ह्यज्यायेत नं अःपु मजू । लसनाया थजाःगु कुतः नं मेगु गुण खः ।

थःगु पत्रकारिताया कर्म धिसिधायेक न्ह्याकेगु निंतिं लहनापाखें छिनाच्वंगु पलाःया निंतिं थौंया दिनय् सुभाय् देछाना, झीगु सः जुयाः लहना धिसिधायेक दनाबिल । अले भिंतुना देछाय् – लहना सकल मानव जातिया लहनाय् सम्मानं नां काइगु संचार माध्यम जुइमाः । संचार कर्मबाहेक नं झीगु भाय्, लिपि, कला, संस्कृति, सम्पदा, साहित्यया जः ह्वलाः ह्यूपाः थनाच्वंपिंत सिरपाःया माध्यमं, हनाया माध्यमं उत्साह बीगु कर्म नं तःजी । गुकिइ कलाया झःझः धाःगु नस्वालं लहनाया लसता सदां लुमनीगु लुमन्ति जुयाबी । थुकथं हे सः तयाच्वने फयेमा, लसता ह्वला च्वनेफयेमा । सकसिया लहना जुयाच्वने फयेमा । भिंतुना ।