टर्कीया इस्तानबुलं वःगु टिके ७२६ नम्बरया टर्किस एयरलाइन्सया विमान त्रिभुवन अन्तरराष्ट्रिय विमानस्थलय् अवतरण यायेगु झ्वलय् मि च्याःगु दु।

विमानस्थल सुरक्षा ज्याकुथिया प्रहरी उपरीक्षक राजकुमार सिलवालया कथं विमान अवतरण यायेगु झ्वलय् विमानया टायरय् मिं च्याःगु खः। “थौं सुथय् विमान अवतरण यायेगु झ्वलय् टायरय् मिं च्याःगु खः, दमकलया ग्वाहालिइ मि स्याःगु दु, आः अवस्था सामान्य दु”, वय्कलं धयादिल, “आः जाँचया निंतिं छुं ई रनवे बन्द यानागु दु।”

वय्कःया कथं विमानय् २७३ यात्रुत व ११ म्ह ‘क्रू मेम्बर’ दूगु खः। सकलें यात्रुपिंत सकुशल पिने लिकागु दु। आः प्राविधिक जाँच जुयाच्वंगु दु धकाः सिलवालं जानकारी बियादिल।

Categorized in राष्ट्रिय