प्रतिनिधिसभाया थौंया बैठकय् विपक्षी दलया नेतापिंसं सुकुमबासी बस्ती व्यवस्थापन, अध्यादेश लिसेंया विषय सरकारया ध्यानाकर्षण याकूगु दु।

बैठकया आकस्मिक इलय् उगु दलया नेतापिंसं आह्वान जुइ धुंकूगु संसद् स्थगन यानाः अध्यादेश हःगु, भावी प्रधान न्यायाधीशया सिफारिसय् प्रचलित अभ्यास व परम्परा त्वाःथःगु धकाः चिन्ता प्वंकूगु दु। नेपाली कांग्रेसया निष्कल राईं प्रतिनिधिसभा न्हूगु नियमावली मस्यौदा च्वयेगु झ्वलय् थःम्हेस्यां तःगु ब्यागलं मत तसें सरकारं भूमिहीन सुकुमबासीयात वैकल्पिक व्यवस्था मदयेकं बस्तीं चिइकूगुलि विरोध यानादिल।

नेकपा (एमाले) या पद्माकुमारी अर्यालं संसदीय मर्यादा व विधिया शासनयात सम्मान यायेत लिसें न्ह्यब्वःगु अध्यादेशत लित कायेत इनाप यानादिल। नेपाली कम्युनिष्ट पार्टी (नेकपा) या युवराज दुलालं नीप्यघौया बःचाः हाकःगु सुचं बियाः सुकुमबासी बस्ती चिइकूगुलिं मानवीयताया सम्मान मजूगु धयादिल।

श्रम संस्कृति पार्टीया नायः हर्कराज राईं लिपुलेकय् भारतं नाका चायेकाः मानसरोवरया मार्ग तब्याकूगु इलय् तकं सरकार मौन च्वंगु द्वपं तयादिल। राष्ट्रिय प्रजातन्त्र पार्टीया खुश्बु ओलीं सुकुमबासी बस्ती व्यवस्थापनया झ्वलय् मानवीय संवेदनशीलतायात बिचाः मयाःगु धयादिल।

Categorized in राजनीति