न्यू जेनिथ इङ्गलिस मोडल स्कूलपाखें २०८२ सालया एसईई ताःलाःपिं ब्वँमिपिन्त बिदाई बीगु ज्या याःगु दु।

ब्वनेकुथि सञ्चालक समितिया नायः पुष्प श्रेष्ठया सभापतित्वय् जूगु ज्याझ्वलय् येँ मनपा १८ वडाया अध्यक्ष न्हुछेकाजी महर्जन मूपाहाँकथं झायादीगु खः। मूपाहाँ महर्जनं येँ मनपा १८ वडा दुने यक्व ब्वनेकुथि दुसां नं उपिं मध्ये म्हो शुल्कं नं उच्चस्तरीय शिक्षा बीगु ज्याय् न्यूजेनिथ न्ह्यज्यानाच्वंगु खँ कुलादिसें मचांनिसें थुगु हे स्कूलय् ब्वनाः ब्वलंपिं विद्यार्थीपिं +२ तगिमय् नं थन हे ब्वन धाःसा स्यनामिपिसं नं उमित म्हसीगु हुनिं स्यनेकनेत अःपुइगु व मस्तय्त नं सहज वातावरण दइगु खँ तयादिल।

ब्वनेकुथिया संस्थापक प्रधानाध्यापक राजु महर्जनं एसईई ताःलाःपिं ब्वनामिपिन्त भिंतुना देछासें मचांनिसें थःपिनि ब्वनेकुथिइ ब्वंका तयापिं विद्यार्थीपिं थःगु हे ब्वनेकुथिइ +२ तगिमय् ब्वंका च्वनागु व्यवस्थापन विषय ब्वनेत हे मेमेगुब्वनेकुथिइ वनीबलय् थःत दुःख ताइगु खँ तयादिल। वय्कलं थःपिसं ब्वनेकुथिइ व्यवस्थापन विषय ब्वंकेगुली छुं नं कथंया कम्प्रोमाइज मयानागु नं न्ह्यथनादिल ।

Categorized in राष्ट्रिय