सिकाली देगलय् वार्षिक पूजा व प्रसाद ग्रहण ज्याझ्वः बछलागाः आमाई (जेठ २ गते) शनिवाः तःजिक क्वचाल । परम्परागत तुकंबहाः ह्यूमत निस्तेनाथ खलः अन्तर्गत सिकाली अजिमा संरक्षण गुठीया ग्वसालय् थुगुसी न्हापांखुसी थुकथंया ज्याझ्वः ग्वसाःग्वःगु खः। सिकाली अजिमाया झिंनिदँया जात्राया इलय् सिकाली येँय् बिज्याकीगु चलन दु।

थ्व इलय् सिकाली अजिमायात सिकाली अजिमा संरक्षण समितिं विशेष पूजा बियाः लसकुस यायेगु चलन दु। थुगुसी येँ मनपा १२ वडाया आर्थिक ग्वाहालिं पचली भैरव लागाय् च्वंगु सिकाली देगः दयेकेज्याजुयाच्वंगु व थुगु देगः पूवंकाः विशेष पूजा यायेगु आज्जु दुगु जूसां जेठ ३ गतेनिसें अनला न्ह्याइगु व उगु इलय्नेवाः समाजय् भिं ज्या याये मज्यूगु धार्मिक विश्वासकथं जेठ २ गते हे पूजा न्ह्याकागु गुथिया न्वकु विजयलाल डंगोलं कनादीगु दु।

विशेष पूजनाया निंतिं गुथिया जःपिं खोना थ्यंक वनाः सिकालि देवगणपिन्त ब्वना हःगु खः। ज्याझ्वलय् येँ मनपा १२ वडाया अध्यक्ष बालकृष्ण महर्जन, यल मनपा २१ वडाया अध्यक्ष रविन्द्र महर्जन, प्रतिनिधिसभा सदस्य कृपा महर्जनलिसेंया ब्वति दुगु ख ।

Categorized in राष्ट्रिय