सामाखुसीइ रानवारीइ लालपुर्जा दुगु छेँ सरकारं थुनेगु ज्या याकन दिकेमाः धका माननिय कुलभक्त शाक्यं म्हिगः संसदय् सः तःगु दु । राज्यं मुआब्जा बिना जवरजस्ति लालपुर्जा दुगु छेँय् थुनेगु ज्या तुरुन्त दिकेमाःगुलि बःबियादीगु दु।

जिल्ला प्रशासन कार्यालय येँ नं सामाखुसीइ च्वंगु निजी छेँय् थुनेगु धकाः चिं तयेवं उकियात कयाः विरोध जूगु दु । छवाः न्ह्यःया शनिवाः हे छेँ थुनेगु कथं जिल्ला प्रशासक कार्यालयं चिं तयेगु ज्या याःगु खःसा उकिया विरुद्ध स्थानीय जनता व सुकुम्बासीतय्सं पुनरावेदन अदालतय् मुद्दा तयेवं आःयात सुकुम्बासीया लिसे लालपूर्जा दुगु छेँ थुनेगु ज्या स्थगित जूगु खँ अभियन्ता लिसे पीडित शैलेश शाक्यं लगंबरें कनादीगु दु।

वय्कःया कथं थौंकन्हय् सामाखुसी रानीवारी वनेगु लँपु २५ फिटया दुसा अन १० फिट सुकुम्बासी चीकेवं ३५ लिटया लँ जुइ। अथे हे वय्कःया छेँया लिउने १५ फिटया मेगु लँ दुसा आः वय्कःया छेँ न्ह्यःने थप करिडोर दयेकेगु धकाः जिल्ला प्रशासन कार्यलयं चिं तःगु खः। निखेरं लँ दयेक दयेकं हाकनं करिडोर छुकिया निंतिं माःगु धकाः न्ह्यसः तसें वय्कलं थःपिंत उचित क्षतिपूर्ति बीमाःगु माग नं यानादीगु दु। वय्कलं सामाखुसीइ २०६५ सालय् तयारी छेँय् न्याःगु खःसा उगु इलय् तक मापदण्ड लागू मजूनिगु खँ नं कनादीगु दु। थम्हं छेँ न्यानागु लछि लिपा मापदण्ड लागू जूगु जानकारी बियादिसें न्हापा मापदण्ड मदुथाय् मापदण्ड दयेकाः स्थानीय वासिन्दयात विस्थापित यायेगु ज्या गलत जूगु खँ नं वय्कलं धयादीगु दु।

वय्कलं थम्हं छेँ व जग्गाया कर आः तक नं निरन्तर पुलाच्वनागु जानकारी बियादिसें मापदण्ड लागू जुइधंकाः नं सरकारं कर कायेगु ज्या यानाच्वंगु व आः वयाः मापदण्ड अःखः धकाः छेँ थुनेगु ज्या गलत जूगु खँ धयादिल । सरकारया गलत ज्यायात कयाः थम्हं मुद्दा तयेगु तयारी यानाच्वनागु जानकारी बियादिसें वय्कलं वडाय् वनाः सः तयेगु झ्वलय् वडा सचिवं केदार रिजालं कर पुलातःगु खँयात स्वीकार यानादिसें आः वयाः छेँ थुनेगु ज्या गलत जूगु खँ स्वीकार याःगु जानकारी नं बियादिल । वय्कलं धयादिल, ‘वडा सचिवयात जिमिगु समस्या कनागु दु । वडा सचिवं क्षतिपूर्ति मबीकं छेँ थुनेगु ज्या गलत जुइ धकाः जिमित आश्वासन नं बियादीगु दु । वय्कलं आवश्यक जुल धाःसा उचित क्षतिपूर्तिया निंतिं माःगु पौ च्वयाबीगु धयादीगु दु ।’वय्कलं न्हापा थम्हं नेवाः मुद्दायात कयाः आन्दोलन यानागु कारणं तत्कालीन मेयर बालेन साहं थःत ब्वला सालेकथं दकलय् न्हापां थः च्वनाच्वनागु लागाय् च्वंगु छेँय् थुनेगु स्वःगु द्वपं नं शाक्यं बियादीगु दु । वय्कलं धयादिल, ‘जि न्हापा न्हू सतक तब्या यायेगुया लिसे तत्कालिन मेयर साह थौंकन्हय् प्रधानमन्त्रीं याःगु ज्याया विरोध यानागु खः ।

उकिया ब्वला सालेत जक वय्कलं जि च्वनाच्वनागु बस्ती चीकेत्यंगु जक मखुला धइगु न्ह्यसः ब्वलनाच्वंगु दु । अनया सुकुम्बासी बस्ती थुंगु खँयात कयाः लाःगु मुद्दाया पूर्ण पाठ  थ्वहे वइगु १० गते बीगु तयारी पुनरावेदन अदालतं यानाच्वंगु दु। वय्कलं थःगु लागाय् करिडोर दयेकेगु आवश्यकता मजूगुधासें धयादिल, ‘सर्वसाधारणया जनताया छेँ थुनाः पार्क दयेकेगु गुलि उचित धकाः न्ह्यसः नं न्यनादीगु दु । वय्कलं छेँ न्यानागु इलय् नक्सा पासया लिसे निर्माण सम्पन्न तकं कयातःगु छेँ गुकथं वैधानिक मजुल धकाः न्ह्यसः नं न्यनादीगु दु । येँ मनपां छेँ दनेगु निंतिं नक्सा पास नं यायेगु निर्माण सम्पन्न बीगु ।

वहे कथं कर नं कायेगु तर आः वयाः छेँ थुने धाये मिले मजूगु खँ नं धयादीगु दु । थ्वहे झ्वलय् नेवाःतय् राष्ट्रिय संगठन नेवाः देय् दबूं खुसिसिथय् सरकारं लागू याःगु मापदण्डया आधारय् निजी स्वामित्वय् दुगु छेँ जग्गा व परम्परागत बस्ती चीकेगु धकाः वयाच्वंगु सुचं प्रति नेवाः देय् दबूया गम्भीर ध्यानाकर्षण जूगु खँ धाःगु दु । नेवाः देय् दबूया नायः रश्मिला प्रजापतिं म्हीग विज्ञप्ति जारी यासें २०६५ सालय् जारी याःगु खुसि मापदण्डया आधार दयेकाः स्वनिगःया खुसि सिथय्या लालपूर्जा दुगु छेँ जग्गा, परम्परागत बस्ती लिसे पुस्तौनिसे च्वना वयाच्वंपिं रैथानेतय्त अनं चीकेगु सुचं जारी यायेगु चिन्ताजनक जूगु धासें आदिवासीतय्त थःगु लागां विस्थापित यायेगु न्यायोचित मजुइगु खँ नं धयातःगु दु ।

छखे सरकारं सुकुम्बासीया लिसे स्थानीय जनताया छेँ थुंगु खँयात कयाः अदालतय् मुद्दा लानाच्वंगु दु । अदालतय् मुद्दा लायेवं सरकारया निर्णय विरुद्ध अन्तरिम आदेश नं जारी यायेगु ज्या जुयाच्वंगु दु । तर सरकारं धाःसा सुकुम्बासीया लिसे स्थानीय जनताया छेँय् थुनेगु ज्या नं निरन्तर न्ह्याकाच्वंगु दु ।

Categorized in राष्ट्रिय