नेवाः देय् दबूया विषयगत कवः नेवाः मिसा दबूया स्वक्वःगु तःमुँज्या न्हूम्ह नायः कथं रमिता शाक्ययात सर्वसम्मतं ल्यःगु दु।

उकथं हे न्वकु पदय् सुनैना मानन्धर (वीरगंज, पर्सा), सुनिता श्रेष्ठ (अर्घाखाँची), शोभा मानन्धर (बागमति प्रदेश), शर्मिला श्रेष्ठ (गण्डकी प्रदेश), उर्मिला श्रेष्ठ (कर्णाली प्रदेश), तिलरुपा श्रेष्ठ (कोशी प्रदेश)यात ल्यःगु खः।केन्द्रीय दुजलय् मिना नगरकोटी, सरिता वज्राचार्य, सोनी श्रेष्ठ, रश्मिकुमारी श्रेष्ठ, सोनिका कंसाकार, रजनी राजभण्डारी, सपना बादे, दिलकुमारी श्रेष्ठ, मेनुका प्रधान, विणादेवी श्रेष्ठ, ब्यूटी श्रेष्ठ, रोजी डंगोल श्रेष्ठ, लक्ष्मी श्रेष्ठ, ईशा श्रेष्ठ अञ्जना श्रेष्ठ प्रधानलिसें नीगुम्ह सर्वसम्मतं ल्यःगु दु।

ज्यासना पुचःया मेपिं पदाधिकारी मुँज्या च्वनाः क्वःछीगु दबुलिं जानकारी बिउगु दु। ज्यासना पुचः ल्ययेगु निंतिं नवीन थेच्वमिया संयोजकतवय् अमिर मैया रञ्जित व बिमला प्रधान दुजःकथं दुथ्याःगु निर्वाचन समिति नीस्वंगु खः । वंगु शनिवाः दबूया नायः कस्तुरी श्रेष्ठया सभापतित्वय् जूगु तःमुँज्याय् मूपाहांकथं नेपालभाषा एकेदेमिया चान्सलरलिसें नेवाः देय् दबूया संरक्षक मल्ल के सुन्दर झायादीगु खः ।ज्याझ्वलय् न्हापांम्ह नेवाः मिसा डिन कुसुम वज्राचार्य, न्हापांम्ह नेवाः मिसा भलिबल कासामिलिसें प्रशिक्षक सलिना श्रेष्ठयात हनेज्या याःगु खः।

उगु हे ज्याझ्वलय् देय् दबूया नायः रश्मिला प्रजापतिं थः मांया नामं नीस्वनादीगु ‘रत्नदेवी प्रजापति सिरपाः’ नेवाः मिसा दबूयात, साहित्यकार जलेश्वरी श्रेष्ठं नीस्वनादीगु ‘हरिदेवी सिरपाः’ साहित्यकार अपर्णा प्रधानयात व मिसा दबूया नायः कस्तुरी श्रेष्ठं नीस्वनादीगु ‘विणादेवी सिरपाः’ शंखधर ज्येष्ठ नागरिक सेवा केन्द्रयात लःल्हाःगु खः। थुकथं हे ज्याझ्वलय् मिसा दबूपाखें पिथंगु ‘लसता पौ’या नं पितब्वज्या याःगु खः।

ज्याझ्वलय् विशेष पाहांकथं नेवाः देय् दबूया नायःलिसें मिसा दबूया संरक्षक रश्मिला प्रजापति, पाहांकथं नेपाल संवत् न्हूदँ राष्ट्रिय समारोह समितिया नायः प्रेमहिरा तुलाधर, किपू नगरपालिकाया प्रमुख कृष्णमान डंगोल, पुलांम्ह मन्त्रीलिसें मिसा दबूया सल्लाहकार अष्टलक्ष्मी शाक्य, नांजाःम्ह बाखं च्वमि जलेश्वरी श्रेष्ठ, पुलांम्ह सांसद सुशिला श्रेष्ठ, नेवाः न्ह्यलुवालिसें वरिष्ठ साहित्यकार सुवर्णकेशरी चित्रकार, नेपाल आदिवासी जनजाति महासंघ (नेफिन)या नायः पेमा ह्याल्मो लामा, इन्दिरा श्रेष्ठ, विमला प्रधान लिसें थीथी व्यक्तित्वपिं झायादीगु खः।

Categorized in राष्ट्रिय