युगकवि सिद्धिचरण श्रेष्ठया ११५ क्वःगु जन्मजयन्तीया लसताय् थुगुसीया ‘युगकवि सिद्धिचरण पुरस्कार–२०८३’ वरिष्ठ साहित्यकार प्राडा गार्गी शर्मायात बिइगु निर्णय युगकवि सिद्धिचरण प्रतिष्ठानं याःगु दु।

प्रतिष्ठानं दां सिरपाः छगू लख तकाया उगु सिरपाःलिसें हनेगु म्हिगः छगू विज्ञप्ति जारी यानाः जानकारी ब्यूगु खः। युगकवि श्रेष्ठया साहित्यिक तेज लिसें सांस्कृतिक धरोहरयात जीवन्त यानातयेगु तातुना प्रतिष्ठानं दँय्दसं नेपाली साहित्य ख्यलय् दीर्घकालीन लिसें च्वछायेबहःगु योगदान बियादीपिं न्ह्यलुवा साहित्यकारपिंत सिरपाः लःल्हानाः वयाच्वंगु दु।थुगु सिरपाःया निंतिं प्राडा मोहन लोहनीया संयोजकत्वय् पुरस्कार छनोट उपसमिति नीस्वंगु खः।

थुकी दुजः कथं प्राडा अभि सुवेदी व प्राडा उषा ठाकुर च्वनादीगु खः। युगकवि श्रेष्ठया जन्म विसं १९६९ जेठ ९ गते जूगु खःसा वय्कः २०४९ जेठ २२ गते मदूगु खः।

Categorized in राष्ट्रिय