थुगुसीया वसन्त ऋतुइ थीथी हिमाल आरोहणया निंतिं अनुमति काःपिं विदेशीया ल्याः अप्वयाच्वंगु दु। पर्यटन विभागया कथं सन् २०२६ या वसन्त ऋतुइ हिमाल आरोहणया निंतिं ७९ देय्या द्वःछि व १८१ म्ह आरोहीपिंसं अनुमति काःगु दु।

विभागया सुचं अधिकारी हिमाल गौतमं दकसिबे अप्वः सगरमाथा आरोहणया निंतिं अनुमति बियागु जानकारी बियादिल। आःतक सगरमाथा आरोहणया निंति ५५ गू देय्या ४९४ म्ह आरोहीपिंसं अनुमति काःगु दु। सगरमाथा आरोहणया निंतिं दकसिबे अप्वः १०९ म्ह चिनियाँ नागरिकपिंसं अनुमति काःगु दु। थ्व बाहेकं सगरमाथाया हे निंतिं अमेरिकाया ७७ म्ह, भारतया ६१ म्ह, बेलायतया ३२ म्ह, रसियाया १८ म्ह, अष्ट्रेलियाया १५ म्ह, जापानया १४ म्ह, नेपाःया १२ म्ह, ब्राजिलया १० म्हेसिनं अनुमति काःगु सुचं अधिकारी गौतमं धयादिल।

थ्व बाहेकं, ल्होत्सेया निंतिं १४३ म्ह, आमादब्लमया निंतिं १११ म्ह, नुप्त्सेया निंतिं ५६ म्ह, हिम्लुङया निंतिं ४६ म्ह, कञ्चनजङ्घाया निंतिं ३६ म्ह, धवनिंतिंरिया निंतिं ३० म्हेसिनं अनुमति काःगु दु। थ्व बाहेकं मेमगु हिमाल आरोणया निंतिं नापं अनुमति जारी जूगु दु।पर्यटन विभागं खुद्वः व न्यासः मिटर सिबें च्वयेया हिमालयात आरोहणया निंतिं अनुमति बिइगु यानाः वयाच्वंगु दु। न्याद्वः व च्यासः निसें खुद्वः व न्यासः मिटर तकया हिमाल आरोहणया अनुमति धाःसा नेपाल पर्वतारोहण सङ्घ (एनएमएं) बीगु याना च्वंगु दु। विभागं थुगुसी थीथी हिमाल आरोहणया निंतिं अनुमति बियाः छगू अर्ब २५ क्वति ८४ लख ६० द्वः ५५४ तका राजस्व सङ्कलन याःगु दु ।

विभागं दकसिबे अप्वः सगरमाथा पाखें छगू अर्ब न्हय्गू क्वति ८६ लख ९१ द्वः ४७५ तका राजस्व सङ्कलन याःगु दु। थ्व बाहेकं, ल्होत्सेपाखें खुगू क्वति ३६ लख २७ द्वः ७००, आमादब्लम पाखें छगू क्वति ६६ लख गुद्वः २००, कञ्चनजङ्घा पाखें छगू क्वति ६० लख ८१ द्वः ६५०, धवलागिंरि प्रथम पाखें छगू क्वति ३४ लख ५४ द्वः ५५०, अन्नपूर्ण प्रथम पाखें छगू क्वति २० लख ४९ द्वः १७५ तका राजस्व सङ्कलन जूगु दु ।

थीथी हिमाल आरोहण न्ह्यानाच्वंगुलिइ सगरमाथाया आरोहण धाःसा थ्वहे वैशाख ३१ गतेनिसें न्ह्याःगु दु । खिपः चिइगु व लँपु दयेकेगु ज्या क्वचायेधुंकाः आरोहीपिंसं आरोहण यायेगु ज्या जुयाच्वंगु दु । लिपांगु ई हलिंया दकसिबे तः जाःगु च्वापुगुँ सगरमाथा लिसें नेपाःया हिमालय् आरोहणया निंतिं विदेशीतय्गु आकर्षण अप्वःगु दु।

Categorized in राष्ट्रिय