राष्ट्रिय महिला आयोगं नारायणहिटी दरबारया न्हापाया राहदानी विभागया भवनपाखें थःगु सेवा बिइगु यानाः तयारी न्ह्याकूगु दु। आयोगया दुजः लिसें प्रवक्ता कृष्णकुमारी पौडेल खतिवडाया कथं आयोगया प्रशासनिक ज्या नारायणहिटीया न्हूगु भवन पाखें न्ह्याये धुंकूगु दुसा छवाःया दुने फुक्कं सेवा सञ्चालन यायेगु कथं तयारी जुयाच्वंगु दु।

आः आयोगं ११४५ हेल्पलाइन सेवा व उजुरी सम्बन्धी ज्या भद्रकालीइ च्वंगु ज्याकुथि पाखें न्ह्याना च्वंगु जूसां छुं दिंया दुने हे उगु सेवा नारायणहिटीं हे सञ्चालन जुइगु धाःगु दु। आयोगया कथं न्हूगु भवनय् आन्तरिक व्यवस्थापन जुइ धुंकूगु दु। नीस्वंसांनिसें आयोग भद्रकालीइ बालं च्वना च्वंगु भवनपाखें सञ्चालन जुयाः वयाच्वंगु खः।

लिपांगु ई आयोगं खाद्य व्यवस्था लिसें व्यापार कम्पनी लिमिटेडया भवन नापं छ्यलाः वयाच्वंगु खः। आयोगं लः, बिजुली नापं लय्या प्यंगू लख तका बालं पुलाच्वंगु धाःगु दु। “आः बाः पुलेमालीगु मखु, संवैधानिक आयोगया गरिमा नापं कायम जुइ। नारायणहिटीइ च्वंगु भवन तुलनात्मक कथं सुविधा सम्पन्न जूगुलिं सेवाग्राहीयात नापं अःपुइ धइगु विश्वास कयागु दु”, दुजः पौडेलं धयादिल। तत्कालीन मन्त्रिस्तरीय निर्णय कथं २०८० असोज २१ गते हे आयोगयात नारायणहिटीइ च्वंगु भवनय् यंकेगु निर्णय जूगु खः। अथे खःसां थीथी प्रशासनिक ज्यां यानाः प्रक्रिया न्ह्याये मफया च्वंगु खः।

सरकारया प्रशासनिक सहजीकरण लिपा ज्याकुथि हिलेगु सारे यायेगु ज्या जूगु खः। प्रधानमन्त्री लिसें मन्त्रिपरिषद्या ज्याकुथिं वंगु वैशाख २२ गते हे आयोगयात सरकारी भवन छ्यलेगु निंतिं पौ छ्वःगु खः। छ्यलाबुलाय् मदूगु सरकारी भवन छ्यलेगु लिसें संवैधानिक आयोगयात बालं पुलेगु खर्च पाखें मुक्त यानाः आर्थिक कथं मितव्ययी दयेकेगु तातुना माःगु प्रशासनिक व्यवस्थापन याःगु प्रधानमन्त्री वालेन्द्र शाहया अनुसन्धान लिसें प्रेस विज्ञ दीपा दाहालं जानकारी बियादिल।

प्रधानमन्त्री ज्याकुथिया सहजीकरणय् न्हापा राहदानी विभागं छ्यलाय् वयाच्वंगु क्वथाय् च्वंगु पुलांगु भ्वंत लिसें सामान व्यवस्थापन यानाः आयोगयात ज्याकुथि सञ्चालनया निंतिं थाय् उपलब्ध याकूगु खः।आयोगं मिसा लिसें मस्तय्त जुइगु हिंसा लिसें विभेदसम्बन्धी उजुरी नापं सेवा प्रवाह यानाः वयाच्वंगु दु।

आयोगया कथं न्हि २० निसें २५ म्हेसियां तप्यंक सेवा कायेगु यानाच्वंगु दुसा ११४५ हेल्पलाइन पाखें देय् दुने लिसें विदेश पाखें न्हिं औसत ५० म्हसिबें अप्वःसिनं सेवा कायाच्वंगु दु।

Categorized in राष्ट्रिय