थ्यंमथ्यं न्यादँ न्ह्यः निसें सञ्चालन जुयाच्वंगु बुद्धएयरया नेपालगञ्ज–पोखरा तप्यंक उडान छुं ईया निंतिं स्थगित जूगु दु। भारतं वइपिं धार्मिक पर्यटकया ल्याः म्हो जूगु व इन्धन खर्च अप्वःगुलिं पोखरा–नेपालगञ्ज तप्यंक उडान लच्छिया निंतिं स्थगन जूगु बुद्धएयर, नेपालगञ्ज स्टेशनया प्रमुख विनितविक्रम शाहं जानकारी बियादिल।

लच्छितक अनला लाःगुलिं भारतं वइपिं भारतीय पर्यटक मवःगुलिं व इन्धन मू नापं थिकुगुलिं नेपालगञ्ज–पोखरा उडान छुं ईया निंतिं स्थगित जूगु वय्कलं धयादिल। पर्यटन प्रवद्र्धन व भारतीय यात्रुयात अःपुकेगु तातुना विसं २०७८ साउन १७ गते निसें वाःय् स्वन्हु नेपालगञ्ज–पोखरा उडान जुइगु यानाच्वंगु खः। उगु उडान म्हिगः मङ्गलबाः निसें स्थगित याःगु खः। नेपालगञ्ज–पोखरा तप्यंक हवाई उडान स्थगित जुइधुंकाः पश्चिम नेपाःया यात्रु, पर्यटन व्यवसायी व सर्वसाधारण निराश खनेदया च्वंगु दु। उडान दिकाब्यूगुलिं आः यात्रुं हाकनं सतकमार्ग पाखें म्होतिं १४ घौया तःहाकःगु यात्रा यायेमालीगु जूगु दु।

एशोसिएसन अफ टुर्स एण्ड ट्राभल्स एजेन्ट्स (नाट्टा) नेपालगञ्जया पहलय् थ्व सेवा सञ्चालनय् वःगु खः। नाट्टा नेपालगञ्जया संस्थापक नायः श्रीराम सिग्देलं बुद्ध एयरं नियमित तालिका कथंया उडान दिकूगु आधिकारिक जानकारी दूगु न्ह्यथनादिसें उडान अनिश्चित जूगु धयादिल। सरकारं यायेमाःगु ज्या निजी ख्यःया न्ह्यलुवाय् जूगु खः सरकारं पहल याये मफयाः बन्द हे जुइगु अवस्थाय् थ्यंगु वय्कःया धापू दु। ३५ मिनेटं हे पोखरा थ्यनीगु तप्यंक उडान स्थगन जुइवं यात्रुं हाकनं तःहाकःगु व थाकूगु सतक यात्राया भरय् च्वनेत बाध्य जूवंगु दु। बुद्ध एयरं १८ सिट क्षमताया बीच क्राफ्ट १९०० डी सिरिज जहाजपाखें सेवा बियाः वयाच्वंगु खः।

उडान सञ्चालनय् वःबले पर्यटन ख्यलय् उल्लेखनीय उत्साह खनेदूगु खः । पोखरां नेपालगञ्ज जुयाः बर्दिया राष्ट्रिय निकुञ्ज, कर्णाली चिसापानी व रारा थेंजाःगु पर्यटकीय गन्तव्य थ्यंकेत अःपुयाच्वंगु खः सा भारतया लखनउ, कानपुर व दिल्लीं वइपिं पर्यटकयात पोखरा वयेवनेत अःपुयाच्वंगु खः। उडान जुया च्वंबले न्यूनतम भाडा प्यद्वः व ९३५ निसें अधिकतम न्हय् द्वः व ६३५ तक निर्धारण यानातःगु खः। यात्रुया चाप अप्वयाः वंगु व न्हिन्हिथं उडान विस्तार यायेगु योजना दयेकूगु खः।

इन्धनया भाः थहांवंगुलिं भाः अप्वःगुलिं यात्रुया चाप म्हो जूवंगु जुयाः उडान स्थगित यायेमाःगु बुद्धएयर नेपालगञ्जं धाःगु दु।

Categorized in राष्ट्रिय