आराध्यदेव पशुपतिनाथया मूर्तिइ श्रीयन्त्रया पूजा आराधना यायेत भारतीय गृहमन्त्री अमित साहं ४० किलो चन्दन देछानादीगु दु।

भारतीय गृहमन्त्रीं छ्वया हःगु चन्दन पशुपतिनाथया मूल अर्चक गणेश भट्टयात लःल्हायेगु संयोजन प्रतिनिधिसभाया दुजः सन्दीप रानां यानादिल। भारतं पशुपतिनाथया छ्यनय् श्रीयन्त्र पूजा यायेत दँय् दसं विशेष कथं चन्दन देछाइगु याइ। थगुने गोआया मन्त्रीं पशुपतिइ ३५ किलो चन्दन देछाउगु खः।

पशुपतिया मूल अर्चकं लःल्हाना कयादीगु चन्दन थौं हे गुठी संस्थान पशुपति गोश्वारा ज्याकुथिया प्रमुख सुशीला शर्मायात भण्डारण यायेत भाला ब्यूगु खः। नेपाल व भारतया जनता जनता दथुइया धार्मिक नापं सांस्कृतिक सम्बन्धं यानाः भारतय् दइगु विशेष कथंया चन्दन दँय् दसं आराध्यदेव भगवान् श्री पशुपतिनाथयात छ्वया हइगु खः।

Categorized in राष्ट्रिय