महालेखापरीक्षकया ज्याकुथिं पुरातात्विक सम्पदा व प्राचीन स्मारकसम्बन्धी नीति, कानुन, मापदण्ड व नियमनलिसें विषय कानुनी सामञ्जस्यता यानाः निर्माण नापं संरक्षणया ज्या यायेत निर्देशन ब्यूगु दु।

ज्याकुथिं पितब्वःगु ६३ क्वःगु प्रतिवेदनय् थुजाःगु निर्देशन बियातःगु खः। प्राचीन स्मारक संरक्षण ऐन, २०१३ या दफा ३ (घ) य् प्राचीन स्मारक स्थल व पुरातात्विकस्थलया संरक्षण पुरातत्व विभागं याइगु व्यवस्था यानातःगु खः।

स्थानीय सरकार सञ्चालन ऐन, २०७४ या दफा ११ या उपदफा २ या खण्ड (फ) या क्रम सङ्ख्या (२) व (३) य् पुरातत्व प्राचीन स्मारक नापं संग्रहालयया संरक्षण सम्भार, प्रवद्र्धन विकास व परम्परागत जात्रा लिसें नखःया सञ्चालन व व्यवस्थापन यायेगु कार्य पालिकाया काम, कर्तव्य व अधिकार अन्तर्गत तयातःगु खः। देगःलिसेंया सम्पदा निर्माण व संरक्षणया निंतिं स्थानीय तह व विभाग निगुलिं निकायं खर्च जुया च्वंगु महालेखा परीक्षकया प्रतिवेदनय् न्ह्यथनातःगु खः।

थथे याइबलय् योजना छनोट नापं कार्यान्वयनय् दोहोरोपना जुइफु। विभागं दुर्गम लागाय् च्वंगु सम्पदाया निर्माणया निरीक्षण व अनुगमन याइबलय् भ्रमण खर्चया लागतनं अप्व जूवनीगुपाखे महालेखा परीक्षकया ज्याकुथिं ध्यानाकर्षण याःगु खः।

Categorized in राष्ट्रिय