नेपाल उद्योग वाणिज्य महासङ्घया वरिष्ठ उपाध्यक्षय् सुरकृष्ण वैद्य व दांभरिइ मनिषलाल प्रधान निर्वाचित जुयादीगु दु।

थौं थन क्वचाःगु निर्वाचनय् वरिष्ठ उपाध्यक्षय् वैद्यं ५६ मत ताःलाकाः त्याकादिल धाःसा रामचन्द्र सङ्घाईं ३० मत हयादिल। वरिष्ठ उपाध्यक्ष पदया निंतिं सुरकृष्ण वैद्य, रामचन्द्र सङ्घाई व हेमराज ढकालं मनोनयन दर्ता यानादीगु ख ।

तर ढकालं लिपा उम्मेवारी लितकयादिल। दांभरि पदय् त्याम्ह मनिषलाल प्रधानं ६१ मत ताःलाकूबलय् वय्कःया प्रतिस्पर्धी अम्बिकाप्रसाद पौडेलं २५ मत हयादिल।

खुम्ह केन्द्रीय दुजः मनोनित

महासङ्घया नायः अन्जन श्रेष्ठं थौं हे निम्ह मिसालिसें खुम्हेसित केन्द्रीय दुजलय् मनोनित यानादिल । मनोनित जुयादीपिं शिवप्रसाद घिमिरे, मनिषलाल प्रधान, नवीन रिजाल, गोकर्ण कार्की, दर्शना श्रेष्ठ व सहारा जोशी खः।

महासङ्घया विधान धारा २९ या (च) १० या व्यवस्थाकथं फुक्क दुजः पुचःया प्रतिनिधित्व जुइकथं म्ह्वतिं नं निम्ह मिसालिसें न्हय्म्ह दुजः मनोनित याये दइगु प्रावधान दु । विधानतः ल्यंदूगु छगू दुजः पदय् धाःसा मनोनय याये ल्यंदनि। 

Categorized in राष्ट्रिय