सरकारं सुकुमवासीतय्त ब्यवस्थित यायेगु ताःतयाः जिल्ला प्रशासन कार्यालय काभे्रपलाञ्चोकपाखें याःगु परिपत्र कथं पनौती नगरया थी थी वडां १३७ म्ह सुकुमवासी छेँजःपिंसं थःपिंत ब्यवस्थित यायेत निवेदन ब्यूगु खः।

नगरया सार्वजनिक सुचं कथं रोशी खुसि–लिक्क च्वनाच्वंपिं सुकुमवासीं उगु ल्याखय् आःतक निवेदन ब्यूगु नगरया ज्याकुथिं धाःगु खः। नगरया ज्याकुथिया कथं निवदेन वइगु झ्वः दःसां नं उपिं छेँजःपिंत स्थानान्तरण यायेगु कथं इमिगु छेँ खाली याकेत प्रक्रिया न्ह्याकूगु खः। नगरं विशेषयानाः खुसि सिथय् व उच्च जोखिमयुक्त थासय् च्वंगु बस्तीयात प्राथमिकताय् तयाः व्यवस्थापन प्रक्रिया न्ह्याकेगु तयारी याःगु नगरप्रमुख रामशरण भण्डारीं कनादिल।

वय्कःया कथं अझ नं नगरलागा नापं सम्बन्धित वडा ज्याकुथिइ सार्वजनिक जग्गा नापं सुकुमवासी बस्तीसम्बन्धी निवेदन सङ्कलन यायेगु ज्या न्ह्याकातःगु खः। नगर ज्याकुथिया कथं आःतक वडा नं ७ व ८ लिसें थी थी वडां १३७ म्हेसिगु निवेदन दर्ता जुइधुंकूगु खः। थथेहे ल्यंदूगु वडां नं विवरण वइगु झ्वः न्ह्यानाच्वंगु धाःगु खः। थथेहे वडा नं २ पाखें ५३, वडा नं ४ पाखें ७, वडा नं ५ पाखें ८, वडा नं ७ पाखें १५, वडा नं ८ पाखें ७, वडा नं ९ पाखें ९, वडा नं १० पाखें २४, वडा नं ११ पाखें ८ नापं वडा नं १२ पाखें ६ गू परिवारया निवेदन दर्ता जूगु खः।

नगरया ज्याकुथिं न्हापांगु चरणय् रोशी खुसि लिक्कया जोखिमयुक्त बस्ती चीकेगु योजना दयेकूगु धाःगु खः। वर्खा इलय् खुसिबाः व कटानया उच्च जोखिम जुइगु जूगुलिं अजाःगु थासय् बसोबास याइपिं नागरिकतय्गु सुरक्षायात ध्यानय् तयाः प्रक्रिया न्ह्याकूगु भण्डारीया धापू खः। स्थानीय तहं सार्वजनिक जग्गाया संरक्षणलिसें दीर्घकालीन व्यवस्थापनया विकल्प मालेगु तयारी नं यानाच्वंगु धाःगु खः।

थुकिया निंतिं धात्थेंयापिं सुकुम्बासीतय्गु म्हसीका, तथ्याङ्क सङ्कलन व आवश्यक समन्वयया ज्या जुयाच्वंगु धाःगु खः।

Categorized in राष्ट्रिय