बुगःद्यःया रथय् तयातःगु ऐतिहासिक लिंपाता बेपत्ता जुगुलिं प्रहरीइ उजुरी तःगु दु।रथया जवः व खवः घमाःया निगुलिं थासय् च्वंगु लिपाता मध्ये जवय् लिपाता तनाच्वंगु जिल्ला प्रहरी कार्यालया  एसपी गौतम मिश्रं संचार माध्यमयात जानकारी ब्यूगु दु।

वय्कःया कथं वैशाख २४ गते उगु लिंपाता तनाच्वंगु खबर प्रहरीयात वःगु खः। रथयात्रा न्ह्याकूबलय् थ्व विषय मल्ह्वंगु तर रथयात्रा सुरु जूगु छुं ई लिपा अभियानकर्तातय्सं रथया उगु ब्व मदुगु खँय् न्ह्यसः तःगु खः।

वयां लिपा गुथि संस्थानं जिल्ला प्रशासन कार्यालय यल पाखें प्रहरीइ निवेदन दर्ता यासें मालेत इनाप याःगु खः ।उगु लिंपाताय् कर्कट नागया आकृति खनेदुगु व थुकियात हिति नं धायेगु याःसा विक्रम सम्बत् १९९६ सालय् जुद्धशमशेर राणां पलिस्था याःगु खः।

Categorized in राष्ट्रिय