येँ महानगरपालिकाया कार्यवाहक प्रमुख सुनिता डङ्गोलं बौद्ध परम्पराय् लिधनाच्वंगु ‘बहाः–बही’ संस्कृति गौरवपूर्ण इतिहास जूगुलिं उमिगु पुनरूत्थान यायेगु धयादिल।

नेपाल मण्डल लिटरेचर कल्चरल ट्रष्टं थौं ग्वसाः ग्वःगु ‘बहाल–बहिल संस्कृति सामाजिक अध्ययन’ विषयक गोष्ठीइ कार्यवाहक प्रमुख डङ्गोलं येँय् दुने दूगु बहाः–बहीतय्गु वस्तुगत परिस्थिति व सामाजिक पक्षतय्गु विषयय् अध्ययनं थप चकंकूगु धयादिल। येँय् दुनेया १६ गू बहीतमध्ये गुलिखय् बहीतय् नां जक ल्यंदनीगु, उमिगु तजिलजि, परम्परा व रीतिथितितय्गु अभिलेख नाश जुयाः वने धुंकूगु अवस्थाय् दु। डङ्गोलं बहाः–बहीया तजिलजि, परम्परा व रीतिथितितय्गु अभिलेख तयार यासें पुनरुस्थान लिसें हस्तान्तरण, पुस्तान्तरणया निंतिं नापं योजना दयेकाः न्ह्याः वनेत सुझाव बियादिल ।

“झीसं पुनरुस्थान यायेगु झ्वलय् अनया सौन्दर्य, ऐतिहासिक व धार्मिक पक्षयात नापं बिचाः यायेमाः”, वय्कलं धयादिल, “उकिया नापनापं मूर्त–अमूर्त सम्पदाया संरक्षण व संवद्र्धनय् नापं झीगु ध्यान वनेमाःगु खनेदु । बहाः–बहीया विकास, संरक्षण व पुस्तान्तरणया निंतिं झीसं हातेमालो यानाः न्ह्याः वनेनु धकाः जिं इनाप यानाच्वना।”ट्रष्टया नकिं सन्ध्या बज्राचार्यं बहाः–बहीया तजिलजिया अध्ययन व अनुसन्धान थौंया आवश्यकता जूगु धासें गोष्ठीइ विज्ञतय्गु उपस्थितिइ ऐतिहासिक सम्पदा, बौद्ध दर्शन व परम्परागत सामाजिक संरचनायात चकंकेगु विषयय् दुग्यंकं सहलह यानागु जानकारी बियादिल।

तनाः वनेत्यंगु बही संस्कृति, अनया पुलांगु परम्परा व रीतिरिवाजतय्गु अभिलेख तयार यायेगु, मध्यकाल व वसिबें न्ह्यःनिसें विकास जूगु बौद्ध विहारतय्गु ऐतिहासिक पक्ष कुलाः न्हूगु तथ्यत सार्वजनिक यायेगु व युवा पुस्तायात थःगु मौलिक तजिलजि व गौरवपूर्ण इतिहासप्रति जागरूक दयेकेगु थें जाःगु विषयय् केन्द्रित जुइत उगु ख्यःया विज्ञतय्सं धाःगु दु । बौद्ध कलाअन्तर्गत बही दुने संरक्षित मूर्तित, पौभा चित्रकला व विशेष यानाः गुँला लच्छि याइगु ‘बही द्योः ब्वयेगु’ परम्परायात अथे यानाः अन्तरराष्ट्रियस्तरय् म्हसिकेगु धइगु विषयय् विज्ञतय्सं छ्याता ब्यूगु खः।

Categorized in राष्ट्रिय