ख्वपया ऐतिहासिक लिसें सांस्कृतिक पर्यटकीय लागा चाँगुनारायण नगरपालिकायात थौं ‘योगनगर’ घोषणा याःगु दु।

चाँगुनारायण नगरपालिका–७ य् च्वंगु विद्युत् तालिम केन्द्र, खरीपाटीइ थौं नगरपालिकापाखें ग्वसाः ग्वःगु ज्याझ्वलय् बागमती प्रदेशया मुख्यमन्त्री इन्द्रबहादुर बानियाँं घोषणापत्र वाचन यासें चाँगुनारायणयात ‘योगनगर’ घोषणा यानादीगु खः। वय्कलं उगु लसताय् ‘चाँगु योग ज्योति सन्देश’ स्मारिकाया चिखिफ्यने ज्या नापं यानादिल।

बागमती प्रदेशया संस्कृति लिसें पर्यटनमन्त्री सुरेश श्रेष्ठं योगनगर घोषणां चाँगुनारायणया पर्यटन विकासय् न्हूगु आयाम तनीगु विश्वास प्वंकादिल। पतञ्जली योग समिति नेपालया संरक्षक बालमुकुन्द सुवालं मंकाः योग साधना याकादीगु खः। ज्याझ्वःयात क्वचायेकादिसें सभापति नापं नगरप्रमुख जीवन खत्रीं चाँगुनारायणया नगरवासीया स्वास्थ्य, सकारात्मक सोच व समृद्धिया निंतिं नगरपालिकां योगयात न्ह्यपलाखय् तयागु धयादिल।

सङ्घीय सांसद गुरु बराल, पतञ्जली योग समिति नेपालया राष्ट्रिय नायः सुदर्शन सुवेदी, बागमती प्रदेश स्वास्थ्य मन्त्रालय, प्रादेशिक योग समितिया विज्ञ सदस्य नवराज काफ्ले, योग जिल्ला समन्वय समिति ख्वपया नायः विजेन्द्र ध्वनिलिसेंयापिंसं नं योगया महत्वयात कयाः थःगु बिचाः तयादीगु खः।

Categorized in राष्ट्रिय